маориф
Донишгоҳи миллии Тоҷикистон ба низоми кредитӣ мегузарад
Ин нуктаро Нуриддин Саидов, ректори Донишгоҳи миллии Тоҷикистон, зимни нишасти матбуотӣ баён дошта, таъкид намуд, ки низоми нав бартариҳои зиёде дорад. Ба андешаи ӯ, низоми кредитии таълим имкон медиҳад, ки донишҷӯ мустақилона ва тамоми сол машғули омӯзиш бошад, устодро худ интихоб намояд ва ҳамарӯза аз ҷараёни донишандӯзиаш ба раёсати донишгоҳ ҳисобот диҳад. Тавре мавсуф ёдовар шуд, низоми кредитӣ ба пешгирии фасод низ мусоидат хоҳад намуд. Роҳи дигари пешгирии фасодро ӯ дар ҷорӣ намудани имтиҳони тестӣ медонад. Ҳоло даври дуюму сеюми қабули имтиҳонҳо дар донишгоҳ ба тариқи тест сурат мегирад.
Дастоварди дигари ин муассисаи таълимӣ таъсиси студияи телевизионии "Паёми Донишгоҳи миллии Тоҷикистон" ва бунёди матбаа мебошад. Барои ифтитоҳи радиои донишгоҳ низ таҷҳизоти зарурӣ харида шудааст ва рӯзҳои наздик он ба фаъолият оғоз хоҳад кард. Дар ин самт донишгоҳ ба Кумитаи телевизион ва радиои назди Ҳукумати ҷумҳурӣ шартнома ба тасвиб расонидааст. Ҳамин тавр, барномаҳои дар студияи донишгоҳ таҳиянамудаи донишҷӯён тавассути радиоию телевизиони ҷумҳурӣ пешниҳод мегардад.
Хотирнишон бояд кард, ки имрӯз дар Донишгоҳи миллии Тоҷикистон 16394 нафар донишҷӯ ба таҳсил фаро гирифта шудаанд ва барои идомаи таҳсил дар муассисаҳои таълимии хориҷӣ донишгоҳ бо 127 давлат шартнома ба имзо расонидааст.
Барнои АЮБЗОД
Баёни ақида (0) Санаи нашр: 10.01.12 №: 8 Мутолиа карданд: 5701
