маориф
Донишҷӯён соҳиби ду диплом мегарданд
Донишгоҳи технологии Тоҷикистон барномаи зинавии ихтисосҳои гуногунро бо муассисаҳои таҳсилоти олии касбии Украина-Донишгоҳи давлатии техникии Тернопол, Донишгоҳи миллии сохтмону меъморӣ ва Донишгоҳи миллии технология ва дизайни Киев ба роҳ монд. Акнун донишҷӯён имкон пайдо намуданд, ки дар баробари таҳсил дар Тоҷикистон тариқи фосилавӣ тавассути технологияҳои иттилоотию коммуникатсионӣ дар Донишгоҳи давлатии техникии Тернопол таҳсил намуда, соҳиби ду диплом гарданд.
Татбиқи созишномаҳои ҳамкории донишгоҳ бо як қатор муассисаҳои таҳсилоти олии Русия низ самараноку чашмгир аст. Алҳол аз кишвари мо дар ин муассисаҳо 510 нафар донишҷӯ таҳсил мекунад, - гуфт Нуралӣ Шоев, ректори Донишгоҳи технологии Тоҷикистон, зимни нишасти матбуотӣ ба хабарнигорон.
Номбурда дар посух ба пурсиши хабарнигорон изҳор дошт, ки ин муассисаҳо аз ҳисоби маблағҳои худ барои мо мутахассисонро тайёр мекунанд. Интихоби донишҷӯён тариқи имтиҳонҳои қабул аз ҷониби намояндагони ин донишгоҳҳо сурат мегирад.
12 нафар унвонҷӯи донишгоҳ таҳти роҳбарии олимони ин муассисаҳои таълимӣ корҳои илмӣ-тадқиқотии худро дар соҳаҳои техникӣ ва технологӣ ройгон иҷро менамоянд.
Мафтуна БАХТИБЕКОВА
Баёни ақида (0) Санаи нашр: 24.01.12 №: 14 Мутолиа карданд: 5546