президент
Пойтахт ба Конфронси байналмилалӣ ва Наврӯзи ҷаҳонӣ омода мегардад
27 январи соли 2012 Эмомалӣ Раҳмон, Президенти кишвар, доир ба омодагӣ ба Конфронси байналмилалӣ оид ба ҳамкории иқтисодӣ бо Афғонистон ва Наврӯзи байналмилалӣ, ки дар шаҳри Душанбе баргузор мегарданд, машварати корӣ доир намуд.
Дар машварат аъзои Кумитаи тадорукот оид ба омодагӣ ба ин чорабиниҳо, роҳбарони вазорату идораҳо ва ташкилоту муассисаҳои марбута, масъулони Дастгоҳи иҷроияи Президенти Ҷумҳурии Тоҷикистон ва намояндагони аҳли илму фарҳанг ва адаби мамлакат иштирок намуданд.
Доир ба омодагӣ ба Конфронси байналмилалӣ оид ба ҳамкории иқтисодӣ бо Афғонистон ва Наврӯзи байналмилалӣ, ки имсол дар даҳаи сеюми моҳи март дар шаҳри Душанбе баргузор мешаванд, вазири корҳои хориҷӣ Ҳамроҳхон Зарифӣ ва муовини сарвазири ҷумҳурӣ Руқия Қурбонова гузориш доданд.
Аз ҷумла иттилоъ дода шуд, ки барои иштирок дар Конфронси байналмилалӣ оид ба ҳамкории иқтисодӣ бо Афғонистон, ки дар сатҳи вазирон баргузор хоҳад шуд, намояндагони 40 давлат ва 35 созмони минтақавию ҷаҳонӣ изҳори омодагӣ кардаанд.
Дар ҷашни Наврӯзи байналмилалӣ низ иштироки роҳбарони як қатор давлатҳои ҷашнгирандаи ин иди бостонӣ ва намояндагони воломақом ва аҳли илму фарҳанг аз кишварҳо ва созмонҳои сершумори ҷаҳон дар назар аст.
Эмомалӣ Раҳмон, Сарвари давлат, ба масъулони дахлдор доир ба омода кардани нақшаю барномаҳои ин чорабиниҳои байналмилалӣ ва дар тамоми қаламрави кишвар бо шукӯҳу шаҳомати хоса истиқбол гирифтани соли нави аҷдодӣ супоришҳои мушаххас дод. Аз ҷумла таъкид гардид, ки ободонию сабзкорӣ, бунёди боғу гулгаштҳои зебо, тозаю озода кардани ҳар хона ва кӯчаю хиёбон, ба роҳ мондани чорабиниҳои илмию фарҳангӣ, озмунҳои гуногуни ҳунармандони мардумӣ дар тамоми шаҳру ноҳияҳо ва ҳар деҳаю ҷамоат вусъат дода шавад.
Баёни ақида (0) Санаи нашр: 31.01.12 №: 16 Мутолиа карданд: 3675