энергетика
Чаро истеҳсоли барқ кам шуд?
Истеҳсоли қувваи барқ дар соли 2011 нисбат ба соли 2010-ум 721 миллион кВт.соат кам шуд.
Абдулло Ёров, раиси ширкати "Барқи Тоҷик", инро ба сардиҳои ғайричашмдошти моҳҳои аввалу охири солу коҳиш ёфтани маҷрои дарёи Вахш ва низ бинобар аз эҳтиёҷоти ҷумҳурӣ зиёд будану пайдо нашудани харидори хориҷӣ, берун аз турбинаҳо, бе истифода аз обанбори Норак раҳо кардани миқдори калони оби баробар ба истеҳсоли 3372 кВт. соат неруи барқ рабт дод.
Илова бар ин, ба гуфти ӯ, бо вуҷуди сохтмони неругоҳҳои хурду хатҳои тозаи интиқоли барқ ва насби зеристгоҳҳои нав ва ба ин васила афзоиш додани потенсиали истеҳсолӣ, ки соли 2011 аз ҳисоби маблағҳои худии ширкат ба ин мақсад 56,6 миллион сомонӣ сарф шудааст, проблемаи ҷамъоварии маблағи барқи истифодашуда нисбат ба соли 2010 коҳиш ёфта бошад ҳам, ҳалли худро наёфтааст.
Мавсуф ба сифати мисол аз корхонаҳои Вазорати мелиоратсия ва захираҳои оби ҷумҳурӣ ёдовар шуд, ки дар ин сол ба маблағи 32,9 миллион сомонӣ қувваи барқ истифода карда, ҳамагӣ 4,8 миллион сомонӣ пардохт намудаанд. Бақияи қарзи умумии ин вазорат дар назди ширкат ҳоло ба 182,5 миллион сомонӣ расидааст. Ва яке аз сабабҳои қарздории калони "Барқи Тоҷик" аз неругоҳи "Сангтӯда-1" ба напардохтани ҳақи барқи истифодашуда аз тарафи вазорату идораҳо ва аҳолӣ вобаста аст.
Неъматуллоҳи ЁРМУҲАММАД
Баёни ақида (0) Санаи нашр: 31.01.12 №: 16 Мутолиа карданд: 3312
