номаҳо
Ба хонаи махсуси пиронсолон ниёз дорем
Пирӣ таъсирашро ба зиндагиям мегузорад. Эҳсоси танҳоӣ мекашам. Интизори як ҳамсуҳбатам, аммо он ҳеҷ аз дари хонаам ворид намешавад. Дунёи кӯдакону ҷавонон дигар аст, ба ҷаҳони ман мутобиқ нест. Фарзандону набераҳоям бештар ба кори худ овораанд. Бар асари андешаҳои зиёд зуд-зуд бемор мешавам. Ҳама рӯзу шабҳо дарди танҳоиро таҳаммул менамояму лаб во намекунам. Аз рӯзгор шикоят надорам. Пулу молам басанда аст. Мехоҳам хонаи махсусе барои ман барин пиронсолони хоҳишманд бисозанд, ки ҳамаи шароитҳоро дошта бошад. Аз хизмати табибон баҳравар шавем. Бо ғизоҳои хоси даврони пиронсолӣ таъмин гардем. Дар боғ сайругашт намоем. Суҳбати фозилон, шоирону ҳунармандонро доир кунанд. Китобхонаву ҳуҷраҳои компютериро дар ихтиёрамон вогузоранд.
Дар он ҷо бо ҳамсолон, фикр мекунам, ки кас эҳсоси танҳоиву хастагӣ наменамояд. Андешаҳои беҳудаву бемориҳои вазнин моро ёр намешаванд. Фарзандону набераҳоямон вақташонро беҳуда барои мо сарф намекунанд. Бо хотири шод ба хабаргириамон меоянд. Шояд суолам бидиҳед, ки ин хона аз кадом маблағ сохтаву нигаҳдорӣ мешавад? Ва мо аз кадом ҳисоб дар ин хона то замони фарорасии марги зебо зиндагонӣ мекунем? Посух медиҳам: ин хонаро сармоягузоре бояд бунёд намояд. Ҳар пиронсоли хоҳишманд барои зиндагияш дар он макон маблағи муайян мепардозад.
Бунёди он саро ҳам мисли як меҳмонхона аст. Дар пойтахти кишвар чи қадар меҳмонхонаҳои хубу замонавӣ сохта тавонистем. Сохтмони як хонаи пиронсолон чи мушкилӣ дорад? Бо бунёду истифодаи он чанд кас соҳиби ҷойи кори доимӣ мешавад ва мушкилоти мо пиронсолон рафъ мегардад ва ин хона ҳатман ба сармоягузораш маблағи сарфнамудаашро барзиёд бармегардонад. Агар чунин хонаҳо нафъ намеоварданд, дар кишварҳои пешрафтаи хориҷӣ онҳоро намесохтанд.
Ҷ. ҲУСЕЙНОВ,
шаҳри Душанбе
Баёни ақида (0) Санаи нашр: 4.02.12 №: 17 Мутолиа карданд: 4312
