номаҳо
Осорхона маъхази омӯзиши забон аст
Осорхона макони илму фарҳангу гаҳвораи таъриху тамаддун аст ва таърихи инсониятро дар ин ё он мавзеъ муаррифӣ мекунад. Чун яке аз нишонаҳои инсоният забон аст ва он ҳастии миллат маҳсуб мешавад, осорхона дар омӯзиш ва рушди забони миллӣ мақоми хос дорад ва ин рисолати худро тавассути намоиши овезаву лавҳаҳои матнӣ, матнҳои эзоҳӣ, пораҳои шеъриву гуфторҳо дар васфи қаҳрамонон ва суханрониҳои роҳбаладон аз давраҳои таърихӣ иҷро мекунад.
Аз ин нигоҳ осорхона минбари тавоно ва фарогири ҷомеа, ба вижа мактабиёну донишҷӯён, аст ва бояд он афкори ҷомеаро ташаккул диҳад. Бинобар ин роҳбаладро маҳорати суханварӣ зарур аст ва ӯ бояд андешаашро бо забони оммафаҳму нишонрас ва балеғу фасеҳ ба сомеон расонад. Барои муаррифии таърихи кишварамон тавассути нигораҳои осорхонаҳо донистани забони давлатӣ нақши муҳим дорад.
Истифодаи пораҳои шеъриву гуфторҳо дар васфи родмардони Ватан ва меросбарони халқу миллат аз ғановати забони тоҷикӣ гувоҳӣ медиҳад.
Бинобар ин дар осорхона бояд мутахассисони асил ва шефтагони забону адабиёт ва таърихи тоҷик бо ҳисси баланди масъулият фаъолият намоянд. Масъулон ба ин муассисаи фарҳангӣ бояд ташрифи хонандагони мактабҳои таҳсилоти миёнаи умумӣ ва донишҷӯёни донишкадаву донишгоҳҳо, коллеҷу омӯзишгоҳҳоро ташкил намоянд.
Кимиёхон АТОЕВА,
сармуҳофизи маъхази осорхонаи таърихии вилояти Суғд,
номзади илмҳои филологӣ
Баёни ақида (0) Санаи нашр: 4.02.12 №: 17 Мутолиа карданд: 4348
