барқияҳо
Барқияи шодбоши Эмомалӣ Раҳмон ба Маҳмуди Аҳмадинажод
11 феврали соли 2012 Эмомалӣ Раҳмон, Президенти Ҷумҳурии Тоҷикистон, ба Маҳмуди Аҳмадинажод, Раиси Ҷумҳурии Исломии Эрон барқияи шодбош ирсол намуд, ки дар он аз ҷумла омадааст:
Ҷаноби Олӣ,
Шумо ва мардуми шарифи Эронро бо солгарди ҷашни инқилоби исломӣ самимона табрику таҳният мегӯям.
Ҳукумат ва ҷомеаи Тоҷикистон робитаҳои фаъоли гуногунарсаро бо Ҷумҳурии Исломии Эрон ҳамеша пураҳамият ва арзишманд медонанд.
Гузаштаи пурифтихори таърихӣ, пайвандҳои фарҳангӣ, забонӣ, нажодӣ ва динии муштарак аз муҳимтарин омилҳоянд, ки Тоҷикистону Эронро дар як ҳавзаи тамаддунӣ қарор медиҳанд ва заминаи заруриро барои ҳамгироии бештар фароҳам месозанд.
Зимни равобити пурсамар ва густардаи иқтисодӣ дар зарфи даҳ соли охир ҳаҷми умумии гардиши тиҷорати хориҷӣ миёни Тоҷикистону Эрон панҷ баробар зиёд шуда, сармоягузориҳои мустақими эронӣ ба иқтисоди Тоҷикистон ба маротиб афзудаанд.
Дар ин росто натиҷаҳои сафари расмии Шумо, Ҷаноби Олӣ, ба Тоҷикистон дар аввали моҳи сентябри соли гузашта ва тавофуқоти тозае, ки дар мулоқоти сатҳи олӣ ҳосил шудааст, аз оғози марҳалаи нави тавсеаи равобити густурдаи кишварҳои мо башорат медиҳанд.
Бо умеди тавсеаи рӯзафзуни муносиботи ҳасана ва бо ибрози табрикоти муҷаддад ба Шумо, Ҷаноби Олӣ, тансиҳатию комёбиҳо ва ба мардуми Эрон амну субот, саодату шукуфоӣ орзумандам.
Баёни ақида (0) Санаи нашр: 14.02.12 №: 20 Мутолиа карданд: 3396