мулоқотҳо
Мулоқоти Эмомалӣ Раҳмон бо Чжу Хунҷе
28 феврал, нимаи дуюми рӯз Эмомалӣ Раҳмон, Президенти кишвар, Чжу Хунҷе - ноиби якуми раиси Бонки содироту воридоти Ҷумҳурии Мардумии Чинро ба ҳузур пазируфт.
Дар мулоқот масоили ҳамкории ду ҷониб баррасӣ ёфтанд.
Бо қаноатмандӣ зикр гардид, ки бо қарзҳои имтиёзноки ин бонк дар Тоҷикистон лоиҳаҳои бузургҳаҷми бунёди хатҳои барқи 500-киловолтаи Ҷануб-Шимол, 220-киловолтаи Лолазор-Хатлон ва Хуҷанд-Айнӣ анҷом ёфта, навсозии роҳҳои мошингарди Душанбе-Чанак, Душанбе – Данғара – Кӯлоб – Хоруғ – Қулма, нақбҳои мошингузари Шаҳристону Чормағзак ва татбиқи дигар лоиҳаҳо бомуваффақият идома дорад.
Ҳар ду ҷониб ба таҳким ва густариши минбаъдаи ҳамкории судбахш дар соҳаҳои роҳсозӣ, энергетика, саноати кӯҳӣ, коркарди маҳсулоти кишоварзӣ ва ғайра изҳори ҳавасмандӣ карданд.
www.president.tj
Чжу Хунҷе, ноиби якуми раиси Бонки содироту воридоти Ҷумҳурии Мардумии Чин, ки баъд аз мулоқот бо Эмомалӣ Раҳмон, Президенти Ҷумҳурии Тоҷикистон, бо хабарнигорон суҳбат дошт, аз сатҳи кунунии ҳамкориҳои дуҷониба изҳори қаноатмандӣ кард.
Мавсуф аз суҳбат бо Сарвари давлати Тоҷикистон хушҳолӣ иброз намуда, ин дидору гуфтугуро ҷиҳати вусъати равобити минбаъда дорои аҳамияти муҳим донист. Ӯ изҳор дошт, ки Бонки содироту воридоти Ҷумҳурии Мардумии Чин минбаъд низ дар татбиқи лоиҳаҳои гуногуни иқтисодӣ нақши фаъолтар хоҳад гузошт. Аз ҷумла се самти афзалиятнок - татбиқи тарҳҳои истеҳсолӣ, инфрасохторӣ ва захираҳои энергетикӣ дар меҳвари асосии ҳамкориҳои дуҷониба қарор хоҳанд гирифт.
Чжу Хунҷе зикр кард, ки бонки мазкур ҳамчунин ширкатҳои чиниеро, ки дар рушди иқтисоди Тоҷикистон таъсиргузоранд, дастгирӣ менамояд. Бино ба гуфти ӯ, бонк тасмим гирифтааст, ки ҳамчунон ба навсозии роҳҳои мошингард, бунёди роҳҳои оҳан, истихроҷи маъданҳои кӯҳӣ ва коркарди маҳсулоти кишоварзӣ мусоидат намояд.
Фирӯзи РАҲМОНИЁН,
«Ҷумҳурият»
Баёни ақида (0) Санаи нашр: 1.03.12 №: 28 Мутолиа карданд: 2030
