президент
Сарвари давлат машварати корӣ анҷом дод
1 март Эмомалӣ Раҳмон, Президенти кишвар, доир ба корҳои созандагӣ, киштукори баҳорӣ ва омодагӣ ба Наврӯзи байналмилалӣ машварати корӣ анҷом дод.
Доир ба ин ва дигар мавзуъҳои мавриди таваҷҷуҳ нахуст ахбори масъулини Ҳукумати мамлакат, Дастгоҳи иҷроияи Президенти Ҷумҳурии Тоҷикистон ва роҳбарони сохторҳои дигари дахлдор шунида шуд.
Зикр гардид, ки имрӯзҳо дар тамоми шаҳру ноҳияҳои кишвар, ғайр аз минтақаҳои кӯҳистон, бо истифода аз рӯзҳои мусоиди офтобӣ киштукори баҳории зироат ва ниҳолшинонӣ вусъат ёфтааст.
Дар робита ба омодагӣ ба Наврӯзи байналмилалӣ аз ҷумла зикр ёфт, ки роҳбарон ва намояндагони воломақоми як қатор кишварҳои ҷашнгирандаи ин иди фархунда дар он иштирок хоҳанд дошт.
Эмомалӣ Раҳмон, Сарвари давлат, барои вусъати тоза бахшидан ба корҳои мавсимии кишоварзӣ, дастгирии деҳқонону боғпарварон, фаъолияти созандагию ободонӣ ва омодагии сазовор ба таҷлили Наврӯзи байналмилалӣ дар Тоҷикистон ба масъулин супоришҳои мушаххас дод.
Ҳамчунин таъкид гашт, ки пешгирӣ аз оқибатҳои офатҳои табиӣ, ба мисли фуруд омадани ярчу тарма, обхезиҳои баъди обшавии захираи бешумори барфи имсола ва боридани боронҳои селу жола омодагии ҷиддиро талаб мекунад.
Баёни ақида (0) Санаи нашр: 3.03.12 №: 29 Мутолиа карданд: 15328