мулоқотҳо
Британияи Кабир аз шарикони муҳими Тоҷикистон дар Аврупост
2 март Эмомалӣ Раҳмон, Президенти ҷумҳурӣ, Ник Харви, вазири давлатии Британияи Кабир оид ба Қувваҳои Мусаллаҳро ба ҳузур пазируфт.
Дар мулоқот ҳолати кунунӣ ва дурнамои муносибатҳои Тоҷикистону Британияи Кабир баррасӣ шуд.
"Британияи Кабир аз шарикони муҳими Тоҷикистон дар Аврупо аст ва мо ба густариши бемайлони робитаҳо бо он ҳавасмандем", - изҳор дошт зимни суҳбат, Эмомалӣ Раҳмон, Сарвари давлат.
Ник Харви, бо ишора ба нақши калидии Тоҷикистон дар Осиёи Марказӣ ва кумаки муҳими он ба неруҳои байналмилалии посдори сулҳ дар бозсозии эътидол дар Афғонистон, ба Эмомалӣ Раҳмон - Сарвари давлат ва мардуми кишвар арзи сипос намуд.
Таваҷҷуҳи зиёд ба масоили ҳамкорӣ барои барқарорсозии амнияту субот дар Афғонистон, пешгирӣ аз паҳншавии хатари терроризму ифротгароӣ ва гардиши ғайриқонунии маводи мухаддир аз ин кишвари ноором ва таҳкими эътидоли минтақавӣ зоҳир шуд. Ник Харви, ҳамчунин таъкид дошт, ки ҷомеаи ҷаҳонӣ бояд ба Тоҷикистон бештар кумак намояд, то ки ин мамлакат дар иҷрои рисолати муҳими худ барои пешгирӣ аз хатарҳои мазкур дар марзи тулониаш бо Афғонистони ноором ҳамеша муваффақ бошад.
Дар робита ба ин омодагии Британияи Кабир ба рушди ҳамкорӣ бо сохторҳои низомӣ ва ҳифзи ҳуқуқи Тоҷикистон таъкид гардид. Масоили ташкил ва густариши ҳамкории иқтисодию тиҷоратӣ ва сармоягузории миёни Тоҷикистону Британияи Кабир низ аз мавзӯъҳои асосии суҳбат буд.
Гуфтугӯйи судманд ҳамчунин доир ба масоили байналмилалӣ ва дигар мавзуъҳои мавриди таваҷҷуҳ сурат гирифт.
www.president.tj
Ник Харвӣ, вазири давлатии Британияи Кабир оид ба Қувваҳои Мусаллаҳ, дар суҳбат бо хабарнигорон натиҷаҳои мулоқоташ бо Эмомалӣ Раҳмон - Президенти Ҷумҳурии Тоҷикистонро судманд арзёбӣ кард.
Бино ба гуфти ӯ, дар ин дидор зарурати тақвияти ҳамкориҳои муштарак дар мубориза бо қочоқи маводи мухаддир, терроризму ифротгароӣ таъкид шудааст.
Вазири давлатии Британияи Кабир изҳор дошт, ки дар суҳбат бо Сарвари давлат нақши калидии Тоҷикистон дар Осиёи Марказӣ, ёрӣ ба неруҳои байналмилалии посдори сулҳ дар Афғонистон ва дигар самтҳои ҳамкории дуҷониба баррасӣ шудааст. Зикр шуд, ки барои берун овардани неруҳои ҳарбии Британияи Кабир аз Афғонистон, ин кишвар ба ёрии Тоҷикистон, Қазоқистон ва Қирғизистон ниёз дорад, ки дар ин робита гуфтугу бо роҳбарияти се кишвар идома дорад.
Ник Харвӣ таъкид намуд, ки Британияи Кабир бо таваҷҷуҳ ба вазъи минтақа омодааст ҳамкорӣ бо сохторҳои низомӣ ва ҳифзи ҳуқуқи Тоҷикистонро тақвият бахшад. Ӯ ҳамчунин изҳор дошт, ки кишвараш тасмим гирифтааст, баъд аз хуруҷи неруҳои посдори сулҳ аз Афғонистон як қисми таҷҳизоту лавозимоти ҳарбии худро дар ихтиёри неруҳои дохилии Ҷумҳурии Исломии Афғонистон боқӣ гузорад.
Фирӯзи РАҲМОНИЁН,
"Ҷумҳурият"
Баёни ақида (0) Санаи нашр: 6.03.12 №: 30 Мутолиа карданд: 1977
