мулоқотҳо
Мулоқоти Эмомалӣ Раҳмон бо Ҷеймс Маттис
31 март Эмомалӣ Раҳмон, Президенти кишвар, Ҷеймс Маттис, Фармондеҳи Фармондеҳии марказии Иёлоти Муттаҳидаи Амрикоро ба ҳузур пазируфт.
Дар мулоқот масоили вобаста ба ҳамкории гуногунҷанбаи Тоҷикистону Амрико баррасӣ шуданд.
Бо изҳори қаноатмандӣ аз ҳамгироии судбахши сохторҳои низомию амниятии ду мамлакат дар муборизаи байналмилалӣ бар зидди терроризму ифротгароӣ ҳамзамон роҳҳои таҳким ва густариши ҳамкории минбаъда муҳокима гардид.
"Тоҷикистон ҳамоно хоҳони тавсеаи бештари ҳамёрӣ бо Амрико дар бахшҳои гуногуни амниятӣ ва таҳкими сулҳу субот дар минтақа мебошад", - изҳор намуд зимни суҳбат Эмомалӣ Раҳмон, Сарвари давлат.
Ҷеймс Маттис ба нақши Тоҷикистон дар мусоидат ба неруҳои байналмилалии посдори сулҳ дар Афғонистон ва ҳам дар бозсозии иқтисодиёти ин давлат баҳои баланд дода, ба Эмомалӣ Раҳмон, Сарвари давлат ва мардуми ҷумҳурии мо арзи сипосу қадрдонӣ кард.
Таъкид гардид, ки бо назардошти нақши буферии Тоҷикистон дар пешгирӣ аз паҳншавии хатарҳои терроризму ифротгароӣ ва гардиши ғайриқонунии маводи мухаддир Амрико минбаъд низ ёрии худро ба неруҳои марзбонӣ ва дигар сохторҳои низомию амниятии дахлдори кишвари мо дареғ намедорад, пеш аз ҳама барои тақвият додани заминаи моддию техникии онҳо. Аҳамияти густариши чунин ҳамкорӣ, хусусан аз соли 2014, ё худ пас аз хуруҷи неруҳои посдори сулҳ аз Афғонистон калон арзёбӣ гардид.
Гуфтугӯи судманд ҳамчунин доир ба авзои иҷтимоӣ-сиёсии Афғонистон ва мамлакатҳои ҳамсояи он, роҳҳои густариши ҳамкорӣ дар Осиёи Марказӣ ва Ҷанубӣ ва доир ба дигар мавзуъҳои мавриди таваҷҷуҳ сурат гирифт.
Баёни ақида (0) Санаи нашр: 3.04.12 №: 41-42 Мутолиа карданд: 2030
