номаҳо
Шикояту санҷиш ҳам
ҳад доштагист!
Баъди таҳияи ҳамаи ҳуҷҷатҳои зарурӣ, бо иҷозаи Идораи нақлиёти вилоят, хадамоти танзими нақлиёт дар вилояти Суғд соли 2000-ум хатсайри рақами 58 дар самти деҳаи Унҷӣ - маҳаллаи 12-уми шаҳри Хуҷанд мавриди истифода қарор гирифт. Сокинон аз ин иқдом арзи сипос мекарданд. Дар асоси арзу дархости мардуму хоҳиши раисони деҳоти Ҳайдар Усмон ва Унҷии ноҳияи Бобоҷон Ғафуров ҳамин хатсайрро то мавзеи гардиши Қайроққум (собиқ Госснаб) идома додем. Баъд аз ин арзу шикоят аз ҷониби муассисони хатсайри рақами 106 бо сарварии Тутӣ Қаюмова нисбат ба фаъолияти мо оғоз ёфтанд. Ба хотири нуқтагузорӣ ба ин нависонависҳо бо ширкати намояндагони ҳар ду ҷониб - идораҳои нақлиёт ва хадамоти танзими нақлиёт дар вилояти Суғд, ҳамчунин масъулони шуъбаи нақлиёти мақомоти иҷроияи ҳокимияти давлатии вилояти Суғд бо намояндагони васоити ахбори вилоятиву ҷумҳурӣ ду-се маротиба мулоқот анҷом дода шуда бошад ҳам, натиҷаи мусбат набахшид. Фаъолияти мо на кам аз даҳ маротиба аз ҷониби масъулони идораҳои нақлиёти вилоятиву ноҳияи Бобоҷон Ғафуров, хадамоти танзими нақлиёти мусофиркашонӣ ва мақомоти прокуратураи ноҳиявию вилоятӣ мавриди санҷиши ҳамаҷониба қарор гирифт. Фаъолияти моро қонунӣ ҳисобиданд. Соҳибкор Т. Қаюмова ба ҳамаи ин санҷишу шарҳу эзоҳи масъулон қаноат намекунад ва аризабозиву шикоятнависиро ба идораҳои болоӣ идома медиҳад.
Даъвои ӯ аз он иборат аст, ки хатсайри мо ба фаъолияти хатсайрҳои ӯ - № 106 ва 106 "А" халал мерасонидаасту бояд аз байн бардошта шавад ва ё ба самти дигар гардад. Ин даъво асос надорад. Баъдан ин соҳибкор ё худро ба нодонӣ мезанад, ё фаҳмидан намехоҳад, ки феълан мо дар шароити муносибатҳои бозорӣ қарор дорему бояд мутобиқи он амал намоем, яъне бо рақобати солим ва бо хизматрасонии сифатан аъло ба мусофирон, на бо шикоятнависӣ.
Охир ронандагони хатсайри мо, ки 120 нафаранду зиёда аз 50 нақлиётро идора мекунанд, бар асари ин ҳама навиштаҳову санҷишҳо дар ҳолати ногувор қарор доранд. Шикояту санҷиш ҳам ҳад доштагист.
Мирзоқурбон ҲАМДАМОВ,
шаҳри Хуҷанд
Баёни ақида (0) Санаи нашр: 17.04.12 №: 47-48 Мутолиа карданд: 4284
