номаҳо
Фиреби "экспресс"-ро нахӯред!
Маслиҳат медиҳам: агар дар баъзе аз "маршрутка"-ҳои пойтахти кишвар навиштаи "экспресс"-ро бубинед, фиреб нахӯред. Ман инро аз таҷриба мегӯям ва бояд изҳор бидорам, ки чанд бор фиреб хӯрдаам. Он "экспресс" ҳаргиз шуморо зуд ба ҷойи дилхоҳатон ё худ макони муқарраргардида намебарад. Ва ҳам мапиндоред, ки агарчи дертар ҳам бирасад, дар чандин ҷой бо хоҳиши мусофирон намеистад. Не, чунин нест. Дар ҳар куҷое бихоҳад, меистад, албатта, ба хотири гирифтани мусофир. Ва мусофир дар ҷойи зарурӣ ҳатман онро манъ мекунад. Хулоса, аз "маршрутка"-ҳои одӣ ҳеҷ тафовут надорад. Ин қадар ҳаст, ки навиштаи "экспресс" барояш имкон фароҳам меоварад, ки бе баҳсу бе изҳори норизоӣ 1 сомонию 60 дирам роҳкиро пардохт намоед. Албатта, дар бисёр маврид аз ҳар нафари шумо ҳатман ду сомонӣ мегирад. Яъне 40 дирам бақия «надорад».
Мегӯед, инсоф куҷост? Магар он мондааст?!
А. ОЛИМОВ,
шаҳри Душанбе
Баёни ақида (0) Санаи нашр: 17.04.12 №: 47-48 Мутолиа карданд: 4391
