мулоқотҳо
Мулоқот бо гурӯҳи вакилони Порлумони Аврупо
4 май Эмомалӣ Раҳмон, Президенти кишвар, гурӯҳи вакилони Порлумони Аврупо доир ба кор бо кишварҳои Осиёи Марказиро бо сарварии Паоло Бартолотси, раиси гурӯҳ, ба ҳузур пазируфт. Дар мулоқот масоили вобаста ба ҳамкории Тоҷикистон бо порлумон ва дигар сохторҳои Иттиҳоди Аврупо баррасӣ шуданд.
Кори босамари Кумитаи ҳамкории байнипорлумонии Тоҷикистону Иттиҳоди Аврупо, ки соли гузашта таъсис ёфта буд ва баргузоршавии ҷаласаи дуюми он дар шаҳри Душанбе нишонаи тавсеаи робитаҳои судбахши ду ҷониб арзёбӣ гардид.
Изҳори боварӣ шуд, ки Кумитаи ҳамкории байнипорлумонии Тоҷикистону Иттиҳоди Аврупо боз як сохтори нави ҳамкорӣ буда, дар қатори Шӯрои ҳамкории миёни Тоҷикистону Иттиҳоди Аврупо ва дигар сохторҳо дар таҳким ва тавсеаи муносиботи судманди ду ҷониб нақши намоён хоҳад гузошт.
Эмомалӣ Раҳмон, Сарвари давлат, изҳор дошт, ки "муносибот бо Иттиҳоди Аврупо дар миёни афзалиятҳои сиёсати хориҷии Тоҷикистон мақоми хос дорад".
Гуфтугӯи судманд доир ба ҳамкории сиёсӣ, амниятӣ, иқтисодӣ ва илмию фарҳангӣ сурат гирифт. Густариши ҳамкорӣ доир ба рушди ҷомеаи шаҳрвандӣ, демократия ва ҳифзи ҳуқуқу озодиҳои инсон аз мавзуъҳои муҳими суҳбат буд.
Таваҷҷуҳи зиёд ба вусъати дастгирии моддию техникии соҳаҳои маориф, тандурустӣ, ҳифзи иҷтимоии аҳолӣ ва ҳамчунин ҳамкории иқтисодию сармоягузорӣ дар соҳаҳои энергетика, саноат, нақлиёту коммуникатсия, кишоварзӣ ва ғайра бо ҷалби бахши хусусӣ зоҳир гашт.
Бо назардошти талаботи рӯзафзуни Афғонистону Покистон ва дигар кишварҳои Осиёи Ҷанубӣ ба неруи барқ ва маҳсулоти гуногуни дигар таъкид гардид, ки иштирок дар фаъол намудани имкону захираҳои фаровони Тоҷикистон ба ҳар як сармоягузор манфиати зиёд меорад.
Ҳамчунин доир ба дастгирии сохторҳои қудратиии Тоҷикистон, аз ҷумла неруҳои сарҳадӣ барои пурзӯр намудани ҳифзи сарҳади давлатӣ бо Афғонистон ва мубориза бо терроризму ифротгароӣ ва гардиши ғайриқонунии маводи мухаддир табодули назар шуд.
Баёни ақида (0) Санаи нашр: 8.05.12 №: 59-60 Мутолиа карданд: 2178
