маориф
Хатлон. Бо квотаи Президент чанд нафар мехонад?
"Агар мо хоҳем, ки Тоҷикистонро дар оянда ободу осуда гардонем, имрӯз бояд барои наврасону ҷавонони соҳибистеъдоди ҷӯянда шароит фароҳам оварем".
Эмомалӣ РАҲМОН
26 апрел дар толори Филармонияи давлатии Тоҷикистон бо ташаббуси мақомоти иҷроияи ҳокимияти давлатии вилояти Хатлон бо донишҷӯёни хатлонии тибқи квотаи Президенти кишвар дар макотиби олии пойтахт таҳсилдошта мулоқоти васеъ доир гардид.
Ситора Шерова, муовини раиси вилояти Хатлон, зикр кард, ки бо ғамхории Сарвари давлат аз соли 1997 то имрӯз 3 ҳазору 959 нафар хонандаи фаъол тибқи квота донишҷӯ шуд ва то имрӯз 1 ҳазору 630 нафар донишгоҳу донишкадаҳоро хатм кард. Соли таҳсили равон 441 нафар хатмкунанда, аз ҷумла 227 духтар, дар асоси квота аз шаҳру ноҳияҳои вилоят ба муассисаҳои таҳсилоти олии касбии ҷумҳурӣ дохил гардид. Алъон дар 15 мактаби олӣ 2 ҳазору 36 нафар таҳсилро идома мебахшад. Соли равон дар асоси Қарори Ҳукумати Ҷумҳурии Тоҷикистон "Дар бораи қабули донишҷӯён ба муассисаҳои таҳсилоти олии касбии ҷумҳурӣ тибқи квотаи Президенти Ҷумҳурии Тоҷикистон барои солҳои 2011-2015", аз 3 декабри соли 2010, рақами 628 барои ҷавонони вилоят 453 ҷой, аз ҷумла 232 ҷой барои духтарон, муқаррар шуд, ки баҳри иҷрои он дар 24 шаҳру ноҳия корҳои омодагӣ ҷараён доранд. Соли гузашта муассисаҳои таҳсилоти олии касбии ҷумҳуриро 298 нафар хатлонӣ тибқи квота хатм кард, ки аз он 21 нафар сазовори дипломи сурх гардид. Ҳамчунин муовини раиси вилоят тазаккур дод, ки соли равон 3 ҷавони тибқи квота ба Донишгоҳи давлатии Қурғонтеппа ба номи Носири Хусрав дохилгашта аз ноҳияҳои Бохтар, Данғара ва Ёвон бо сабабҳои номаълум то кунун ба дарс ҳозир нашудааст. Ҷамъбасти натиҷаи сессияи тобистонаи соли 2011 ва сессияи зимистонаи соли ҷорӣ нишон дод, ки бинобар сатҳи пасти дониш аз курсҳои гуногун 27 донишҷӯ, (аз ноҳияҳои Балҷувон, Муъминобод, Бохтар, Носири Хусрав, Восеъ, Ҷиликӯл, Хуросон) аз макотиби олӣ хориҷ шуд. Ҳамзамон, 36 донишҷӯи 6 донишгоҳу донишкада бе сабабҳои ҷиддӣ ба шуъбаи ғоибона гузаштаву ба рухсатии академикӣ баромадааст. Ин далелҳо аз фаъолияти нокифояи комиссияи оид ба хоста гирифтани ҷавонони лаёқатманд дарак медиҳад,- тазаккур дод муовини раиси вилоят.
Абдулҳамид Нозимов, мудири шуъбаи илм ва маорифи Дастгоҳи иҷроияи Президенти ҷумҳурӣ, Нуриддин Саидов, вазири маориф, Маликшо Неъматов, раиси Кумитаи ҷавонон, варзиш ва сайёҳии назди Ҳукумати кишвар, оид ба муҳтавои Паёми Сарвари давлат ба Маҷлиси Олӣ сухан ронда, ҷавононро ба таҳсили аъло ва интизоми намунавӣ ҳидоят карданд.
Зокир ҲАСАН, "Ҷумҳурият"
Баёни ақида (0) Санаи нашр: 8.05.12 №: 59-60 Мутолиа карданд: 5684
