мулоқотҳо
Эмомалӣ Раҳмон Дэвид Робсонро
ба ҳузур пазируфт
18 декабр Президенти Ҷумҳурии Тоҷикистон Эмомалӣ Раҳмон президенти ширкати «Тетис Тоҷикистон лимитед» Дэвид Робсонро ба ҳузур пазируфт.
Дар мулоқот масоили ҳамкории ин ширкат бо Тоҷикистон дар соҳаи истихроҷи газу нафт баррасӣ шуд. Дэвид Робсон ба Сардори давлат Эмомалӣ Раҳмон оид ба натиҷаи омӯзиши конҳои нафту гази Тоҷикистон, ки ширкати «Тетис Тоҷикистон лимитед» дар ихтиёр дорад, гузориш дод. Аз ҷумла зикр гардид, ки аллакай истихроҷи газ дар кони Комсомоли наздикии шаҳри Душанбе ва кони Хоҷасартези шаҳри Кӯлоб оғоз ёфтааст ва рӯзҳои наздик интиқоли он ба ду шаҳр ба роҳ монда мешавад. Ширкати «Тетис Тоҷикистон лимитед» ният дорад, ки зимистони равон ба шаҳри Душанбе дар ҳар шабонарӯз аз 15 то 100 ҳазор метри мукааб гази табиӣ интиқол диҳад.
Дэвид Робсон Сардори давлат Эмомалӣ Раҳмонро ҳамчунин бовар кунонд, ки ширкати «Тетис Тоҷикистон лимитед» то охири соли 2010 метавонад дар таъмини пурраи аҳолӣ ва саноати Тоҷикистон бо гази табиӣ нақши намоён гузорад. «Барои расидан ба ин ҳадаф вориднамоии техникаю таҷҳизот, технологияи иловагӣ ва ташкили корҳои омӯзишию истихроҷӣ бо сифат ва суръати баланд идома доранд»- таъкид намуд Девид Робсон. Ба андешаи ӯ Тоҷикистон имкон дорад, дар давоми ду-се соли оянда эҳтиёҷоти худро бо гази табиии худӣ пурра таъмин намояд.
Дэвид Робсон пешрафти намоёни фаъолияти ширкати «Тетис Тоҷикистон лимитед»-ро ҳамчун нишонаи возеҳ аз фазои мусоиди сиёсӣ ва инвеститсионии Тоҷикистон арзёбӣ намуд.
ӯ ҳамчунин иттилоъ дод, ки ширкати мазкур мутобиқи созишномаи нави бо Вазорати энергетика ва саноати Тоҷикистон баимзорасида бо сарфи 10 миллион доллари амрикоӣ корҳои зилзиласанҷиро низ ба роҳ мемонад.
Дар мулоқот оид ба дигар масоили мавриди таваҷҷӯҳ низ гуфтугӯ сурат гирифт.
Баёни ақида (0) Санаи нашр: №: Мутолиа карданд: 5751
