мулоқотҳо
Мусоҳиба бо гурӯҳи эҷодии маҷаллаи «The European Times»
26 май Эмомалӣ Раҳмон, Президенти кишвар, бо гурӯҳи эҷодии маҷаллаи «The European Times» мусоҳибаи хоса анҷом дод.
Тавре иттилоъ дода шуд, ин маҷалла беш аз 410 ҳазор нусха чоп шуда, асосан ба аъзои Порлумони Иттиҳоди Аврупо, порлумонҳои кишварҳои Аврупо, палатаҳои савдову саноат ва бузургтарин ширкатҳои ин қитъаи ҷаҳон ва муассисаҳои бонуфузи молиявӣ, аз қабили Бонки ҷаҳонӣ, Хазинаи байналмилалии асъор, Бонки аврупоии таҷдиду рушд ва дигар доираҳои иқтисодию сармоягузорӣ дастрас мешавад. Маҷаллаи мазкур ҳамчунин ба шакли электронӣ дар сомонаи www.european-times.com нашр мегардад. Ҳар шумораи он ба як кишвари алоҳида бахшида шуда, имконоти иқтисодию тиҷоратӣ, сармоягузорӣ, сайёҳӣ ва дигар афзалиятҳои онро ба ҷаҳониён муаррифӣ менамояд.
Эмомалӣ Раҳмон, Сарвари давлат, имконоти фарохи ҳамкории иқтисодию сармоягузорӣ бо Тоҷикистон ва захираҳои фаровони табиию башарии кишварро ба хонандагони ин маҷалла бевосита муаррифӣ намуд. Таъкид гардид, ки Тоҷикистон дар соҳаи иқтисодиёт низ барои ҳамкорӣ бо тамоми мамлакатҳои ҷаҳон ва ширкатҳои бонуфузи хориҷӣ "сиёсати дарҳои боз"-ро пеша кардааст.
Хотиррасон бояд намуд, ки гурӯҳи эҷодии маҷаллаи «The European Times» тайи се моҳ бо сохторҳои гуногуни давлатию хусусӣ ва ҷамъиятии Тоҷикистон ҳамкорӣ намуда, аз тамоми минтақаҳои кишвар барои як шумораи ин нашрия маводи зарурӣ гирд меорад. Дар ин шумора на танҳо имконоти иқтисодию тиҷоратӣ, сармоягузорӣ, захираҳои фаровони табиӣ, балки зебоиҳои табиати биҳиштосо ва фарҳанги ғании Тоҷикистон инъикос хоҳанд ёфт.
Баёни ақида (0) Санаи нашр: 29.05.12 №: 68 Мутолиа карданд: 2328
