барқияҳо
6 июн Эмомалӣ Раҳмон, Президенти Ҷумҳурии Тоҷикистон, ба Осиф Алӣ Зардорӣ, Президенти Ҷумҳурии Исломии Покистон, барқияи шодбошӣ ирсол намуд, ки дар он гуфта мешавад:
Ҷаноби Олӣ,
Бо камоли мамнуният Шуморо бо санаи муборак дар таърихи муосири муносибатҳои байни давлатҳоямон - бистсолагии истиқрори муносибатҳои дипломатӣ сидқан табрику таҳният мегӯям.
Пас аз соҳибихтиёр гардидани Ҷумҳурии Тоҷикистон кишварҳои ба ҳам дӯсти мо ба муносибатҳои дипломатии хеш ҳусни оғоз бахшида, ба ташаккули шакли сифатан нави равобити байнидавлатӣ шуруъ намуданд.
Дар давраи мазкур сатҳи муносибатҳои дуҷонибаи Тоҷикистону Покистон дар бахшҳои гуногун, аз ҷумла дар соҳаҳои сиёсӣ, иқтисодӣ, тиҷоратӣ, таъмини амнияти минтақавӣ ва илму фарҳанг хеле ҳам боло рафта, мутобиқи манфиатҳои аслии ду давлат ва халқҳояшон рӯз аз рӯз вусъат меёбанд.
Дар ин раванд муколамаи доимии сиёсӣ, аз ҷумла дар сатҳи олӣ, нақши хеле муҳим бозидааст.
Дар шароити имрӯза кишварҳои мо имкониятҳои фаровони тавсеаи ҳамкориҳои мутақобилан судманди худро доранд.
Итминони комил дорам, ки бар асари кӯшишҳои минбаъдаи муштарак равобити гуногунҷанбаи байни кишварҳои мо боз ҳам рушду нумуъ касб намуда, зина ба зина такомул хоҳанд ёфт.
Бо истифода аз фурсати фараҳбахш бо таҷдиди табрикоту шодбошҳо ба Шумо, Ҷаноби Олӣ, сиҳатмандии комилу пирӯзиҳои нав ба нав ва ба мардуми дӯсту бародари Покистон - саодату хушрӯзӣ ва пешрафту шукуфоӣ хоҳонам.
Баёни ақида (0) Санаи нашр: 9.06.12 №: 72 Мутолиа карданд: 3453
