президент
Натиҷагирӣ аз сафари Эмомалӣ Раҳмон ба Чин
8 июн Эмомалӣ Раҳмон, Президенти кишвар, бо аъзои ҳукумати ҷумҳурӣ, роҳбарони идораҳои назди ҳукумат, масъулини Дастгоҳи иҷроияи Президенти Ҷумҳурии Тоҷикистон ва дигар шахсони дахлдор машварати корӣ доир намуд.
Дар машварат, асосан масъалаи вобаста ба татбиқи амалии натиҷаҳои сершумору пурарзиши сафари Эмомалӣ Раҳмон, Президенти мамлакат, ба Ҷумҳурии Мардумии Чин баррасӣ шуд.
Эмомалӣ Раҳмон, Сарвари давлат, ба роҳбарони сохторҳои дахлдор дастур дод, ки барои татбиқи босамари тавофуқоти зимни ин сафар ҳосилшуда нақшаи чорабиниҳо таҳия карда, пешниҳод намоянд.
Тавре зикр гардид, тайи ин сафар танҳо бо ҳузури Эмомалӣ Раҳмон, Президенти Ҷумҳурии Тоҷикистон, 10 санади нав доир ба ҳамкорӣ бо Ҷумҳурии Мардумии Чин дар соҳаҳои энергетика, саноат, нақлиёту роҳсозӣ, геология, кишоварзӣ, бонкдорӣ ва ғайра ба имзо расид.
Ба масъулин доир ба иҷрои тавофуқоти ҳосилшуда, аз ҷумла сохтмони маркази барқу гармидиҳии дуюми шаҳри Душанбе, корхонаи сементбарорӣ дар ноҳияи Шаҳритус, корхонаҳои афинажӣ ва коркарди мис дар шаҳри Панҷакент, комбинати металлургӣ дар мавзеи Зарнисори шаҳри Қайроққум, иншооти иҷтимоӣ дар Панҷакенту Зарнисор, тезондани бунёди нақбҳои Шаҳристону Чормағзак, омодасозии лоиҳаи неругоҳҳои барқи обии "Нуробод-1" ва "Нуробод-2", кашидани хатҳои нави интиқоли неруи барқ, тавсеа додани корҳои геологӣ-иктишофӣ дар майдонҳои ояндадори нафту газ ва маъданҳои кӯҳӣ, рушди технологии соҳаи кишоварзӣ, ташкили технопаркҳо дар деҳот, омодасозии кадрҳои муҳандисӣ-техникӣ дар ҳамаи соҳаҳои афзалиятноки иқтисоди кишвар ва ғайра дода шуд.
Зимни машварат ба масъулини дахлдор, ҳамчунин доир ба сарфакорона истифода бурдани маблағҳои буҷетӣ, хусусан дар ноҳияҳои кӯҳистон ва ҷоннок намудани корҳо дар дигар самтҳои фаъолият супоришҳои мушаххас дода шуд.
Баёни ақида (0) Санаи нашр: 12.06.12 №: 73 Мутолиа карданд: 32429