маориф
Мактаб ба номи ҳомии шарафманди Ватан гузошта шуд
Дар мактаби миёнаи рақами 11-и ноҳияи Роштқалъа бо иштироки Қодири Қосим, раиси Вилояти Мухтори Кӯҳистони Бадахшон, узви Маҷлиси миллии Маҷлиси Олии Ҷумҳурии Тоҷикистон, маросими номгузорӣ баргузор гардид.
Дар рафти суханронӣ Қодири Қосим иброз намуд, ки Ватан фарзандони сарсупурдаи худро ҳаргиз фаромӯш намекунад. Ӯ пешниҳод кард, ки ба мактаб номи Саидмурид Лутфуллоев, фарзанди шуҷои Ватан, гузошта шавад.
Саидмурид Лутфуллоев хатмкардаи ҳамин мактаб буда, баъди хатми Донишгоҳи давлатии шаҳри Хоруғ дар ин ҷо ду сол ба шогирдон дарси адаб додааст. Тақдир ӯро ба кор дар сафҳои неруҳои амнияти кишвар кашид. Капитан С. Лутфуллоев соли 2011 дар муҳориба бо душманони миллат дар минтақаи Рашт қаҳрамонона ҳалок гардид.
Айнулло Лутфуллоев, падари Саидмурид, омӯзгори ботаҷриба, аз он изҳори сипос намуд, ки мақомоти иҷроияи ҳокимияти давлатии вилоят аз ҳолу аҳволи оилаи онҳо зуд-зуд хабар мегирад ва хизматҳои Саидмуридро қадрдонӣ мекунад.
Дар чорабинӣ ҳамчунин ҳамхизматони марҳум аз Раёсати амнияти давлатии вилоят ширкат варзида, аз шуҷоату далерӣ, ору номуси ватандории Саидмурид ёдоварӣ карданд.
Қодири Қосим, барои ду хонандаи беҳтарини мактаб стипендияи раиси вилоятро муқаррар карда, барои таъмири толори варзишии мактаб 12 ҳазор сомонӣ ҷудо намуд.
Раҳмони ГУЛЗОР,
"Ҷумҳурият"
Баёни ақида (0) Санаи нашр: 19.06.12 №: 79-80 Мутолиа карданд: 5551
