номаҳо
Ташхиси нодуруст маъюбам кард
Ду сол пеш аз ин, моҳи март бо дарди камар ба дармонгоҳи минтақавии шаҳри Чкалов муроҷиат намудам ва духтур М.Исмоилова маро муоина карда, пас аз ташхиси рентгенӣ дарди шумо "остеохандрози қисми миёни сутунмуҳра" аст, гуфт ва мутобиқ ба он доруву дармон таъин кард. Даҳ рӯз табобат гирифтам. Моҳи апрел боз дарди камар азобам дод ва бо тавсияи ӯ ба духтури асаб Ш. Маҳмудова муроҷиат намудам. Ӯ низ тавсия дод, ки ташхиси рентгениро гузарам, то ки сабаби дардро ёбад. Рентгенолог Л. Файн дардро "осебёбии асабҳо" номид. Баъд аз хуруҷи дигарбораи дард ба духтури минтақавии шаҳри Чкалов М. Тоҷиева муроҷиат намудам. Ӯ низ табобат фармуд, аммо натиҷа ҳеҷ.
Бо тавсияи дӯстон ба Беморхонаи физиотерапевтии ҷумҳуриявии № 1-и шаҳри Хуҷанд муроҷиат кардам. Ваҳҳоб Толибов ба ман табобатҳои физиотерапевтӣ, монанди электрофарел, маҳс, мӯмиёи кӯҳӣ ва амсоли онро фармуд. Ҳеҷ беҳбудие ҳис накардам.
Моҳи августи ҳамон сол ба Беморхонаи клиникавии вилояти Суғд барои ҷароҳати қафаси сина бистарӣ гаштам ва дар ҳамин ҷо дарди камар боз бештар гашт ва духтур М. Исмоилов, ки маро табобат мекард, тавсия дод, ки ба духтури асаби ҳамин бемористон Н. Шарифов муроҷиат намоям. Ӯ ба ман боз табобати физиотерапевтӣ фармуд барои бист рӯз, аммо натиҷа боз манфӣ. Сипас, духтури минтақавӣ Тоҷиева маро ба беморхонаи вилоятии асаб фиристод. Дар ин ҷо табибон М.Муъминова ва А. Шукуров муолиҷаи физиотерапевтӣ таъин карданд ва ин таъинот бар зарари саломатии ман анҷом ёфт.
Дард зӯрӣ карду моҳи октябр ман боз ба духтурон М.Тоҷиева ва Ш. Маҳмудова муроҷиат намудам. Фитизатор Б. Пӯлодова маро ба беморхонаи касалиҳои сили вилоят ба назди духтур А. Хоҷаев фиристод. Муайян гашт, ки бемории ман "сили сутунмуҳра" будааст.
Ҳамин тавр, бо ташхиси нодуруст ман қариб як сол дар ба дари табобатгоҳҳо гаштам, зарари моддӣ ва равонӣ бардоштам. Ман аз бемасъулиятии табибон ба прокуратураи вилояти Суғд, суди шаҳри Хуҷанд, прокуратураи генералӣ ва вазири тандурустии ҷумҳурӣ шикоят бурдам. Масъулон ба ман ҷавобҳои мушаххас доданд, вале дилам хост, ки тавассути гӯшаи "Розу ниёз"-и "Ҷумҳурият" сухан гӯям, то барои дигар духтурон дарси ибрат бошад.
Ҳаким ҶӮРАЕВ,
шаҳри Чкалов,
маҳаллаи Наврӯз, бинои 10, ҳуҷраи 9
Баёни ақида (0) Санаи нашр: 19.06.12 №: 79-80 Мутолиа карданд: 5192
