сафарҳо
Сарчашмаҳои оби нӯшиданӣ ҳифз шаванд
20 июн Эмомалӣ Раҳмон, Президенти Ҷумҳурии Тоҷикистон, барои иштирок дар ҷаласаи умумии Конфронси Созмони Милали Муттаҳид оид ба рушди устувор вориди шаҳри Рио-де-Жанейрои Бразилия гардид.
Нимаи дуюми рӯз Эмомалӣ Раҳмон, Президенти Ҷумҳурии Тоҷикистон, дар чорабинии якҷояи ЮНЕСКО ва механизми «СММ-Об» оид ба масоили соли байналмилалии ҳамкорӣ дар соҳаи об, ки дар шаҳри Рио-де-Жанейрои Бразилия баргузор шуд, иштирок ва суханронӣ кард.
Дар суханронии худ Эмомалӣ Раҳмон, Сарвари давлат, аз тамоми давлатҳо даъват ба амал овард, ки тавассути амалҳои мушаххас дар соҳаи об ва санитария чораҳои зарурӣ андешанд, то ин ки Соли байналмилалии ду ҳазору сездаҳуми ҳамкорӣ дар соҳаи об пурсамар ҷамъбаст гардида, натиҷаҳои бадастомада дар солҳои минбаъда барои некӯаҳволии мардум ва муҳити зисти устувор истифода шаванд.
Президенти кишвар таваҷҷуҳи ҳозиринро ба бархе аз масоили Соли байналмилалии ҳамкорӣ дар соҳаи об ҷалб намуда, зарурати роҳандозии ҳамкории муассир ва ҳамаҷонибаро ҷиҳати татбиқи Ҳадафҳои Рушди Ҳазорсола ва дигар мақсадҳои мувофиқашудаи байналмилалӣ дар соҳаи таъминоти об ва санитария таъкид намуд. Ҳамчунин, ҳамкорӣ дар соҳаи об барои таъмини рушди устувор ва пешбурди «иқтисодиёти сабз» мавриди диққати махсуси Эмомалӣ Раҳмон қарор гирифт.
Тавре Президенти Тоҷикистон тазаккур дод, «кишварҳо бояд муштарак амал намуда, афзалиятҳои иҷтимоию иқтисодиро муайян созанд, маблағҳоро ба таври оқилона истифода баранд ва обро барои нигоҳ доштани рушди устувор ва тавозуни экологӣ равона созанд».
Сарвари давлати тоҷикон зимни суханронии худ аз бобати таъсири манфии хушкшавии баҳри Арал ба вазъи экологӣ дар ҳавзаи баҳри Арал ва тамоми соҳаҳои иҷтимоию иқтисодии кишварҳои минтақа изҳори нигаронӣ намуд. Чунонки Эмомалӣ Раҳмон пешниҳод кард, «дар чунин ҳолат беҳтар гардидани вазъияти мавҷуда ва рушди минбаъдаи устувори минтақа фақат ба ҳамкории мутақобилан судманд дар бахши истифодаи оқилонаи захираҳои оби минтақа вобаста аст».
Дар ин росто Президенти Тоҷикистон зарур донист, ки дар ҳавзаи баҳри Арал ба ғайр аз стратегияҳои миллӣ, бояд стратегияи ягонаи минтақавии истифодабарии захираҳои оби минтақа амалӣ шавад.
Эмомалӣ Раҳмон, Сарвари давлати Тоҷикистон, ҳамчунин пешниҳод намуд, ки дар ҷараёни татбиқи Соли байналмилалии ҳамкорӣ дар соҳаи об ба масоили ҳамкорӣ дар соҳаи ҳифзи сарчашмаҳои оби нӯшиданӣ диққати махсус дода шавад.
Баёни ақида (0) Санаи нашр: 23.06.12 №: 81 Мутолиа карданд: 1873