сафарҳо
Эмомалӣ Раҳмон: «Ҳадафҳои рушди устувор бояд мушаххасу шаффоф бошанд»
20-уми июн Эмомалӣ Раҳмон, Президенти Тоҷикистон, ҳамчунин дар ҷаласаи мизи гирди конфронси СММ оид ба рушди устувор иштирок ва суханронӣ намуд.
Сарвари давлати Тоҷикистон бо таваҷҷуҳи ҷиддӣ ба мушкилоти вобаста ба афзоиши аҳолии сайёра, тағйироти глобалии иқлим, буҳронҳои молиявӣ, энергетикӣ ва озуқаворӣ, таъкид дошт, ки «ҳадафҳои рушди устувор барои муддати дароз бояд мушаххасу шаффоф бошанд ва аз ҳама муҳимтараш ба қонеъ намудани ниёзҳои табақаҳои аз ҳама осебпазири мардум ва занону кӯдакон равона гарданд».
Эмомалӣ Раҳмон бо арзи сипос аз пазируфта шудани пешниҳоди Тоҷикистон оид ба эълони соли 2013 чун Соли байналмилалии ҳамкорӣ дар соҳаи об аз тамоми давлатҳо даъват намуд, ки «дар кори васеътар гузаронидани чорабиниҳои ин сол фаъолтар ширкат варзанд, то ки муколамаву ҳамкорӣ ва шарикӣ дар соҳаи истифодаи устувор ва дастҷамъонаи захираҳои об амалӣ гардад».
Эмомалӣ Раҳмон, Президенти Тоҷикистон, ҳалли масоили ОБ-ро асоси татбиқи босамари Ҳадафҳои Рушди Ҳазорсола, рушди устувор барои ҳама, энергетика барои ҳама, пешбурди иқтисодиёти «сабз», паст кардани сатҳи камбизоатӣ, дастрасии умумӣ ба озуқаворӣ, таъмини санитария ва дигар ҳадафҳои эълоншудаи глобалӣ номида, ҷомеаи ҷаҳониро ба таҳия ва қабули стратегияҳои мушаххаси маҳаллӣ, миллӣ, минтақавӣ ва байналмилалӣ оид ба идоракунии захираҳои об даъват намуд.
Баёни ақида (0) Санаи нашр: 23.06.12 №: 81 Мутолиа карданд: 1937