сафарҳо
Иштирок ва суханронӣ дар ҷаласаи умумии конфронси СММ оид ба рушди устувор
20 июн Эмомалӣ Раҳмон, Президенти Ҷумҳурии Тоҷикистон, дар ҷаласаи умумии конфронси Созмони Милали Муттаҳид оид ба рушди устувор, ки дар шаҳри Рио-де-Жанейрои Бразилия ифтитоҳ гардид, иштирок ва суханронӣ намуд. Бояд тазаккур дод, ки конфронсро Пан Гӣ Мун, Дабири кулли СММ, ҳусни оғоз бахшид. Конфронс бо як овоз Дилма Русеф - Президенти Бразилияро раиси конфронс ва Эмомалӣ Раҳмон - Президенти Тоҷикистонро яке аз муовинони ӯ интихоб кард.
Сипас аз байни бештар аз 140 сарони давлат ва ҳукуматҳои кишварҳои олам аввалин шуда, Эмомалӣ Раҳмон, Президенти Тоҷикистон, суханронӣ намуд.
Дар суханронии худ Эмомалӣ Раҳмон, Сарвари давлат, ба Стратегияи миллии рушд, ки аз Ҳадафҳои Рушди Ҳазорсола бармеояд ва мағзи муҳтавои онро се масъалаи асосӣ – ноил шудан ба истиқлолияти энергетикӣ, аз бунбасти нақлиётиву коммуникатсионӣ баровардани кишвар ва таъмин намудани амнияти озуқавории мамлакат ташкил медиҳанд, таваҷҷуҳи хоса зоҳир кард.
Тавре Президенти кишвар таъкид сохт, тибқи ин Стратегия истифодаи самаранок ва сарфаи захираҳои табиӣ, ки унсури асосии иқтисоди «сабз»-ро таҷассум менамоянд, инчунин инкишофи бахши иҷтимоӣ ва ҳифзи низоми экологӣ ҷузъи таркибии ислоҳоти дар Тоҷикистон татбиқшавандаро ташкил медиҳанд.
«Дастрасии фарогир ба хадамоти энергетикаи муосир, баланд бардоштани самаранокии энергетикӣ, тавсеаи истифодаи манбаъҳои таҷдидшавандаи энергия масъалаҳои муҳимтарини рушди устуворанд», - иброз дошт Эмомалӣ Раҳмон.
Зимни суханронӣ Эмомалӣ Раҳмон ҷонибдории Тоҷикистонро нисбат ба ташаббуси Дабири кулли Созмони Милали Муттаҳид таҳти унвони «Энергетикаи устувор барои ҳама» изҳор намуд.
Ба қавли Президенти Тоҷикистон, «истифодаи гидроэнергетика ба консепсияи иқтисоди «сабз», ки яке аз мавзуъҳои асосии реҷаи кори Конфронси Рио+20 аст, комилан мутобиқат дорад».
Дар робита ба нақши бузурги ҳамкорӣ дар соҳаи захираҳои об дар амри ноил шудан ба ҳадафҳои рушд, Эмомалӣ Раҳмон аз эълон шудани соли 2013 ҳамчун «Соли байналмилалии ҳамкорӣ дар соҳаи об» аз ҷониби Маҷмаи кулли СММ бо ташаббуси Тоҷикистон махсус хотиррасон шуд.
Ҳамчунин Эмомалӣ Раҳмон, Сарвари давлат, таваҷҷуҳи ҳозиринро ба се масъалаи ба ҳам пайванди экологию иқтисодӣ ва иҷтимоӣ – тағйирёбии иқлим, офатҳои табиӣ ва рушди устувори манотиқи кӯҳистон ҷалб намуд. Ӯ изҳори умед кард, ки ниҳодҳои байналмилалӣ ва кишварҳои мададрасон пешниҳоди Тоҷикистонро оид ба таъсиси Хазинаи байналмилалии ҳифзи пиряхҳо ҷонибдорӣ хоҳанд намуд.
Дар поёни суханронӣ Президенти Тоҷикистон ҷонибдории кишварро аз баррасии масъалаҳои таҳкими чорчӯбаи ниҳодии рушди устувор ва таъсиси мақоми байниҳукуматии сатҳи баланд оид ба рушди устувор, ҳамчунин роҳандозии раванди таҳияи маҷмуи мувофиқашудаи ҳадафҳои фарогир дар соҳаи рушд иброз дошт.
Баёни ақида (0) Санаи нашр: 23.06.12 №: 81 Мутолиа карданд: 1944