мулоқотҳо
Мулоқоти Эмомалӣ Раҳмон бо Соманахалли Малайя Кришна
3 июл Эмомалӣ Раҳмон, Президенти кишвар, Соманахалли Малайя Кришна, вазири корҳои хориҷии Ҳиндустонро ба ҳузур пазируфт.
Соманахалли Малайя Кришна даъватномаи Президент ва Сарвазири Ҳиндустонро ба Эмомалӣ Раҳмон оид ба анҷом додани сафари расмӣ ба ин кишвар тақдим намуд. Тавре зикр гардид, сафари расмии Эмомалӣ Раҳмон, Президенти Тоҷикистон, ба Ҳиндустон, ки дар моҳи сентябри соли равон дар нақша аст, таконбахши муносиботи дӯстӣ ва ҳамкории гуногунҷанбаи ду кишвар хоҳад буд.
Зимни суҳбат масоили ҳамкории сиёсӣ, иқтисодию тиҷоратӣ, амниятию низомӣ ва фарҳангию маърифатии ду мамлакат баррасӣ ёфтанд.
Аз натиҷаҳои 20 соли муносиботи дипломатии Тоҷикистону Ҳиндустон изҳори қаноатмандӣ шуд. Аз ҷумла зикр гардид, ки дар ин муддат 35 санади байниҳукуматӣ ва байниидоравӣ имзо шуда, заминаи хуби ҳамкорӣ муҳайё гардидааст. Бо иштироки сармояи Ҳиндустон ҳоло дар Тоҷикистон 5 корхонаи муштарак фаъолият дорад ва неругоҳи «Варзоб-1» навсозӣ мешавад.
Бо зикри натиҷаҳои намоёни ҳамкорӣ, ҳамзамон таъкид гардид, ки имкону захираҳои истифоданашуда миёни Тоҷикистону Ҳиндустон ҳанӯз хеле зиёданд.
Гуфтугӯи судманд ҳамчунин доир ба ҳамкории байналмилалӣ ва минтақавии ду кишвар, аз ҷумла дар доираи Созмони Милали Муттаҳид, Созмони ҳамкории Шанхай ва доир ба барқарорсозии сулҳу субот дар Афғонистон ва рушди ҳамкории иқтисодию тиҷоратӣ тавассути қаламрави ин мамлакат сурат гирифт.
Баёни ақида (0) Санаи нашр: 5.07.12 №: 87 Мутолиа карданд: 2178
