мулоқотҳо
Таъиноти кадрӣ
7 июл Эмомалӣ Раҳмон, Президенти кишвар, як гурӯҳ кадрҳои роҳбарикунандаи соҳаи маорифи ҷумҳурӣ ва Гвардияи миллиро, ки ба вазифаҳои нав пешниҳод шудаанд, барои суҳбат ба ҳузур пазируфт.
Дар мувофиқа бо Эмомалӣ Раҳмон, Президенти Ҷумҳурии Тоҷикистон, директори Муассисаи таълимии давлатии “Мактаб- интернати ҷумҳуриявӣ дар ноҳияи Рӯшони ВМКБ”, директори Муассисаи таълимии давлатии “Мактаби байналмилалии президентӣ” дар шаҳри Душанбе, сардори Маркази тайёрии кадрҳо, командири Бригадаи махсуси комендантӣ ва сардори Раёсати кор бо ҳайати шахсӣ ва кадрҳои Гвардияи миллии Ҷумҳурии Тоҷикистон ба вазифа таъин гардиданд.
Қобили таъкид аст, ки «Мактаби байналмилалии президентӣ» дар шаҳри Душанбе аз ду бинои таълимӣ барои 1100 ҷойи нишаст, ду бинои хобгоҳ барои 820 ҷой, як бинои истиқоматии хизматии 28 - ҳуҷрагӣ барои муаллимон, ошхона, маҷлисгоҳ, ду толори варзишӣ, варзишгоҳ, бинои дегхона, ҳаммом ва зеристгоҳи барқӣ иборат аст.
Дар биноҳои таълимӣ 84 синфхона, 2 китобхона, 9 синфхонаи компютерӣ, 7 кабинети лингофонӣ, 4 озмоишгоҳи кимиёвӣ, 5 озмоишгоҳи физика, 3 озмоишгоҳи биология, 11 кабинети лексионӣ, 2 маҷлисгоҳ, 1 кабинети нақшакашӣ ва дигар кабинетҳои таълимӣ ва ёрирасон пешбинӣ гардидааст.
Тибқи оиннома таҳсил дар муассисаи таълимии номбурда ба забонҳои тоҷикӣ ва англисӣ сурат мегирад. Дар муассисаи мазкур таҳсил аз рӯи нақша, барнома ва китобҳои дарсии Донишгоҳи Оксфорди Англия ба роҳ монда мешавад.
Зимни суҳбат Эмомалӣ Раҳмон, Сарвари давлат, кадрҳои навтаъйиншударо ба хизмати софдилонаю содиқона ба нафъи халқу Ватан, таълиму тарбияи кадрҳои ҷавон дар муассисаҳои таҳсилоти миёнаву касбӣ ва бо ҳисси баланди масъулиятшиносӣ адо намудани қарзи муқаддаси ватандорию давлатдорӣ ҳидоят намуд.
Баёни ақида (0) Санаи нашр: 10.07.12 №: 88-91 Мутолиа карданд: 2208
