маориф
ДДЗТ: 10 ихтисоси
нав таъсис ёфт
Хуршед Зиёев, ректори Донишкадаи давлатии забонҳои Тоҷикистон ба номи Сотим Улуғзода, дар нишасти матбуотӣ бо хабарнигорон изҳор дошт, ки дар соли таҳсили сипаришуда 712 нафар донишҷӯ ин муассисаи таълимиро хатм намуд. Аз он 484 нафар хатмкунанда соҳиби ихтисоси омӯзгор ва 212 нафар соҳиби ихтисоси тарҷумон гардиданд.
Сарвари таълимгоҳ ҳамчунон гуфт, ки дар донишкада 10 нафар устоди пуртаҷриба аз мамолики хориҷӣ, чун Амрико, Миср, Чин ва Кореяи Ҷанубӣ фаъолияти пурсамар дорад. Истифодаи чунин таҷриба ба боло рафтани сатҳи омӯзиши забонҳо мусоидат намуд.
Ҳамчунин тибқи ҳамкориҳо бо мактаби таҳсилоти олии касбии кишварҳои хориҷӣ 30 нафар имкони таҳсил дар хориҷаро пайдо мекунанд. Ба ҷуз ин дар донишкада сар карда аз соли нави таҳсил вобаста ба талаботи давр боз даҳ ихтисоси нав, аз қабили забонҳои арабӣ-англисӣ, форсӣ-англисӣ, олмонӣ, фаронсавӣ, информатика, минтақашиносӣ, ҳуҷҷатшиносӣ ҷорӣ мегардад.
Солҳои наздик омӯзиши забонҳои испанӣ ва португалӣ ҳамчун забони дуюми хориҷӣ ба роҳ монда мешавад.
Мақсад аз ин ҳама дар сатҳи байналмилалӣ тайёр кардани мутахассисони маҳалӣ мебошад. Донишҷӯён ва омӯзгорон вобаста ба ин аз 2 моҳвораи таълимӣ, 173 компютер, 2 кабинети лингофонӣ, 3 тахтаи электронӣ ва шабакаи интернет самаранок истифода мебаранд.
Нигинаи РАҲМОН,
"Ҷумҳурият"
Баёни ақида (0) Санаи нашр: 12.07.12 №: 92-93 Мутолиа карданд: 5599
