мулоқотҳо
Мулоқоти Эмомалӣ Раҳмон бо хонум Эллис Уэллс
17 июл Эмомалӣ Раҳмон, Президенти кишвар, хонум Эллис Уэллс, директори кабири Шӯрои амнияти миллии Иёлоти Муттаҳидаи Амрико оид ба Русия ва Авроосиёро ба ҳузур пазируфт.
Дар мулоқот масоили ҳамкории рушдёбандаи Тоҷикистону Амрико, пеш аз ҳама дар соҳаҳои амнияту мудофиа баррасӣ шуданд.
"Тоҷикистон Иёлоти Муттаҳидаи Амрикоро яке аз шарикони муҳими худ дар арсаи байналмилалӣ медонад ва ба тавсеаи ҳарчӣ бештари ҳамёрӣ бо он ҳавасманд аст", - изҳор дошт дар оғози суҳбат Эмомалӣ Раҳмон, Сарвари давлат.
Зимни баррасии масоили ҳамкории амниятию низомии ду кишвар, таваҷҷуҳи зиёд ба рушди ҳамгироӣ баъди соли 2014, яъне баъди хуруҷи неруҳои байналмилалии посдори сулҳ аз Афғонистон зоҳир гардид.
Хонум Эллис Уэллс ба нақши Тоҷикистон дар мусоидат ба бозсозии ҳаёти осоишта ва иқтисодиёту иҷтимоиёт дар Афғонистон баҳои баланд дода, ба Сарвари давлат ва мардуми кишвари мо аз номи Ҳукумати Амрико арзи сипос кард.
Ӯ аз мавқеи геостратегии Тоҷикистон ва нақши муҳими созандаи он дар минтақа ёдовар шуда, изҳор дошт, ки Иёлоти Муттаҳидаи Амрико кумаки техникии худро ба неруҳои сарҳадӣ ва дигар сохторҳои марбути Тоҷикистон барои пурзӯр намудани ҳифзи сарҳад бо Афғонистон афзун хоҳад кард.
Дар мулоқот, ҳамчунин доир ба дигар масоили мубрами вобаста ба амнияти минтақавӣ, густариши ҳамкории созанда миёни кишварҳои Осиёи Марказӣ ва Осиёи Ҷанубӣ ва рушди ҷомеаи шаҳрвандии Тоҷикистон гуфтугӯи судманд сурат гирифт.
Баёни ақида (0) Санаи нашр: 21.07.12 №: 95 Мутолиа карданд: 2272
