ҳукумат
Вазъи шаҳри Хоруғ
баррасӣ гашт
Аз маҷлиси ғайринавбатии Ҳукумати Ҷумҳурии Тоҷикистон
25 июл таҳти раёсати Эмомалӣ Раҳмон, Президенти Ҷумҳурии Тоҷикистон, маҷлиси ғайринавбатии Ҳукумати мамлакат баргузор гардид.
Дар маҷлис масъалаҳои умдаи ҳаёти ҷории кишвар, хусусан вазъи кунунии шаҳри Хоруғи Вилояти Мухтори Кӯҳистони Бадахшон, мавриди баррасии ҳамаҷониба қарор гирифт.
Дар оғоз гузориши Шерхон Салимзода, Прокурори генералии Ҷумҳурии Тоҷикистон ва аъзои гурӯҳи ҳукуматӣ - Маҳмадамин Маҳмадаминов, вазири меҳнат ва ҳифзи иҷтимоии аҳолӣ ва Мамадшо Илолов, Президенти Академияи илмҳои Тоҷикистон оид ба таъмини эътидол дар шаҳри Хоруғ шунида шуд.
Баъд аз муҳокимаи нуктаҳои гузориш аз мардуми шарифи ВМКБ, пеш аз ҳама сокинони шаҳри Хоруғ, даъват карда шуд, ки барои ба ҷавобгарии ҷиноятӣ кашидани гурӯҳҳои ҷинояткор ва таъмини волоияти қонуну тартиботи ҳуқуқӣ бо мақомоти масъули давлатӣ ҳамкорӣ намоянд.
Таъкид гардид, ки гурӯҳҳои ҷинояткори мусаллаҳ бояд яроқу аслиҳаро супурда, дар назди қонун ҷавоб гӯянд.
Ҳам аз роҳбарони мақомоти масъули давлатӣ ва ҳам мардуми Бадахшон, қабл аз ҳама шахсиятҳои соҳибнуфузи ин минтақаи баландкӯҳ, талаб карда шуд, ки барои барқарор намудани фазои амну субот ва боварии байниҳамдигарӣ ҷаҳду талош намуда, дар пешгирӣ аз ҷинояту ҷинояткорӣ ва аъмоли худсаронаи ғайриқонунии гурӯҳҳо ва нафарони ҷиноятпеша фаъол бошанд.
Дар фарҷоми маҷлис қарор карда шуд, ки тамоми мақомоти давлатӣ барои ба эътидол овардани вазъи шаҳри Хоруғ ва татбиқи дастуру супоришҳои қаблии Президенти Ҷумҳурии Тоҷикистон доир ба рушди иҷтимоиву иқтисодии вилоят чораҳои аввалиндараҷа андешанд.
Баёни ақида (0) Санаи нашр: 28.07.12 №: 98 Мутолиа карданд: 4889
