мулоқотҳо
Вохӯрии Эмомалӣ Раҳмон бо Сергей Наришкин
17 cентябр Президенти Ҷумҳурии Тоҷикистон Эмомалӣ Раҳмон роҳбари маъмурияти Президенти Федератсияи Русия Сергей Наришкинро, ки ба ҳайси сарвари ҳайати расмии ин давлат баҳри иштирок дар Анҷумани сеюми зиёиёни эҷодкор ва илмии кишварҳои аъзои Иттиҳоди Давлатҳои Мустақил ба шаҳри Душанбе омадааст, ба ҳузур пазируфт.
Дар вохӯрӣ масоили ҳамкориҳои дуҷониба ва бисёрҷонибаи Тоҷикистону Русия ва мавзӯъҳои анҷуман баррасӣ шуданд.
Таваҷҷӯҳи махсус ба масоили ҳамкории бунёдии иқтисодии ду кишвар, аз ҷумла дар соҳаҳои гидроэнергетика, истихроҷи газу нафт ва дигар канданиҳои фоиданок, зоҳир гардид.
Аз рафти сохтмони Нерӯгоҳи барқи обии «Сангтӯда-1», ки то охири соли равон бояд ба анҷом расад, созишҳои дуҷониба оид ба сохтмони се нерӯгоҳи миёнаиқтидори обии дигар дар ҳудуди Тоҷикистон ва аз омодагии ҷониби Русия баҳри иштирок дар сохтмони нерӯгоҳи Роғун изҳори қаноатмандӣ карда шуд.
Рушди ҳамкориҳои илмӣ, фарҳангӣ ва маърифатӣ низ аз мавзӯъҳои сӯҳбат буд. Мусоҳибон аз омодагии ҳар ду ҷониб баҳри кушодани филиалҳои се муассисаи олии таълимии Русия дар Тоҷикистон ва дигар тадбирҳои муштарак изҳори қаноатмандӣ карданд.
Изҳори боварӣ карда шуд, ки Анҷумани сеюми зиёиёни эҷодкор ва илмии кишварҳои аъзои Иттиҳоди Давлатҳои Мустақил ба дарёфти роҳҳои наву судбахши ҳамкориҳои илмию фарҳангӣ ва техникию технологӣ муваффақ шуда, аз худ нақши муҳим мегузорад.
Баёни ақида (0) Санаи нашр: №: Мутолиа карданд: 9377
