номаҳо
Чаро забони давлатӣ фаромӯш мешавад?
Ба пойтахти кишвар -шаҳри Душанбе барои иштирок дар бархе маҷлису ҷамъомадҳо гоҳҳо аз рӯи вазифае, ки ба дӯш дорам, даъват мешавам. Хуб аст, ки маҷлисҳо бо забони давлатӣ оғоз мешаванд. Аммо кас пешакӣ муайян карда наметавонад, ки он бо кадом забон - тоҷикӣ ё русӣ идома меёбаду ҷамъбаст мегардад. Гап дар сари он аст, ки агар нафаре бо забони русӣ сухан кунад ё саволе диҳад, ҳатман посух бо ин забон дода мешаваду забони давлатӣ фаромӯш мегардад. Дар баъзе аз ноҳияҳо садри маҷлис дар чунин мавридҳо ҷамъомадро бо забони ӯзбекӣ мебарад. Албатта, ба забону намояндаи миллати дигар бояд эҳтиром гузошт, аммо на дар чунин мавридҳо. Агар онҳо аксариятро ташкил диҳанд ва ё ақалан даҳ нафар бошанд, ман ҳаргиз зид намебароям.
Чаро намояндаи миллате беш аз 30-40 сол ва ё ҳама умр дар кишвари мо кору зиндагӣ мекунаду забонамонро намеомӯзад? Охир муҳоҷири меҳнатии тоҷик барои як ё ду соли фаъолият забони корфарморо меомӯзад-ку?!
Агар талаботи Қонуни Ҷумҳурии Тоҷикистон "Дар бораи забони давлатии Ҷумҳурии Тоҷикистон"-ро дар ин маврид риоя намекунем, боре биандешем, ки тоҷикем, миллати куҳанбунёдем ва нангу номуси ватандорӣ бояд дошта бошем.
Н. ШЕРАЛИЕВ,
ноҳияи Тавилдара
Баёни ақида (0) Санаи нашр: 23.08.12 №: 109 Мутолиа карданд: 5050
