мулоқотҳо
Мулоқоти Эмомалӣ Раҳмон бо Дирк Нибел
25 август Эмомалӣ Раҳмон, Президенти кишвар, Дирк Нибел, вазири федеролии ҳамкории иқтисодӣ ва рушди Ҷумҳурии Федеролии Олмонро ба ҳузур пазируфт.
Дар мулоқот масоили ҳамкории гуногунҷанбаи Тоҷикистону Олмон баррасӣ шуд.Таваҷҷуҳи зиёд ба рушди ҳамкории иқтисодию тиҷоратӣ ва нақлиётию транзитӣ бо назардошти имконоти фарохи бозорҳои Афғонистону Покистон ва дигар кишварҳои Осиёи Марказӣ ва Ҷанубӣ зоҳир карда шуд.
Дирк Нибел таъкид дошт, ки Олмон ба дастгирии лоиҳаҳои зербиноии Тоҷикистон дар соҳаҳои энергетика, нақлиёту коммуникатсия, ки ба рушди кулли минтақа нигаронда шудаанд, манфиатдор аст.
Гуфтугӯйи судманд, ҳамчунин доир ба авзои иҷтимоию сиёсии Афғонистон ва таъсири он ба кишварҳои минтақа ва ҷаҳон сурат гирифт. Ба гуфтаи ӯ, Олмон ба Тоҷикистон дар пурзӯр намудани ҳифзи сарҳадаш бо Афғонистон, дар мубориза бо гардиши ғайриқонунии маводи мухаддир ва пешгирӣ аз паҳншавии хатари терроризму ифротгароӣ кумаки худро ҳамоно идома медиҳад.
Дар мулоқот ҳамчунин доир ба дигар масоили мавриди таваҷҷуҳ гуфтугӯ сурат гирифт.
www.president.tj
Дар мулоқоти Эмомалӣ Раҳмон, Президенти Ҷумҳурии Тоҷикистон, бо Дирк Нибел, вазири федеролии ҳамкории иқтисодӣ ва рушди Ҷумҳурии Федеролии Олмон, бо қаноатмандӣ аз равобити ҳасанаи 20 - солаи байни ду кишвар ба тақвияти ҳамкориҳои минбаъда дар соҳаҳои гуногун таъкид шудааст.
Ин матлабро Дирк Нибел пас аз мулоқот бо Сарвари давлати Тоҷикистон дар ҷамъи хабарнигорон баён намуд. Бино ба андешаи ӯ, Тоҷикистону Олмон дар зарфи 20 соли барқарории робитаҳои дипломатӣ дар самти равобити дӯстона ва ҳамкориҳои судбахши тарафайн ба пешрафтҳои амиқ даст ёфтаанд.
Вазири федеролии ҳамкории иқтисодӣ ва рушди Ҷумҳурии Федеролии Олмон итминон дод, ки кишвараш дар пурзӯр намудани ҳифзи сарҳадоти Тоҷикистон бо Афғонистон, мубориза бо терроризму экстермизм ва суботи минтақа дар канор нахоҳад буд. Ҳамзамон тавсеа бахшидани ҳамкориҳои ду кишвар дар бахши иқтисод, энергетика, нақлиёту алоқа ва густариши ҳамкориҳо дар соҳаи тандурустӣ дар меҳвари гуфтугӯи ду ҷониб қарор гирифтааст.
Фирӯзи РАҲМОНИЁН,
«Ҷумҳурият»
Баёни ақида (0) Санаи нашр: 28.08.12 №: 111 Мутолиа карданд: 2634
