мулоқотҳо
Сафирони нав ба Президент эътимоднома супурданд
Эмомалӣ Раҳмон, Президенти Ҷумҳурии Тоҷикистон, аз сафирони фавқулода ва мухтори 9 давлати ҷаҳон дар Тоҷикистон эътимоднома қабул намуд.
Ҳамин тариқ, сафирони Австрия Волфганг Баняй, Шоҳигарии Норвегия Оле Ёҳан Бёрной, Шоҳигарии Испания Мануэл Ларротҷа Парада, Шветсия Аке Петерсон, Ҷумҳурии Мисри Араб Маҳмуд Гамил Аҳмад Элдиб, Салтанати Уммон шайх Яҳё ибни Абдулло ибни Солим оли Фанна, Ҷумҳурии Индонезия Фостер Гултом, Ҷумҳурии Демократии Федеролии Эфиопия Мулату Тешоме ва Ҷумҳурии Ангола Жоаким Аугусто де Лемуша бо тақдими эътимодномаҳои худ ба Сарвари давлат ба фаъолияти дипломатӣ дар Тоҷикистон шурӯъ карданд.
Президенти Ҷумҳурии Тоҷикистон зимни қабули эътимоднома аз сафирони нав изҳори боварӣ кард, ки онҳо бо фаъолияти босамар заминаи муносибатҳои дӯстонаи Тоҷикистон бо кишварҳои худро таҳким бахшида, ба тавсеаи ҳамкориҳои судманд мусоидат хоҳанд кард.
Сарвари давлат зимни дидору гуфтугӯ бо сафирони нав вижагиҳои муносибот ва самтҳои асосии ҳамкории Тоҷикистон бо кишварҳои номбурдаро матраҳ намуда, таҳкиму густариши минбаъдаи онро ба манфиати ҷонибҳо донист. Аз ҷумла, дар ҳошияи муносибатҳои дуҷониба ва ҳам дар доираи Иттиҳоди Аврупову дигар созмонҳо тавсеаи ҳамкориҳо бо Австрия, Норвегия, Испания ва Шветсия зарур шумурда шуд.
Зимнан Эмомалӣ Раҳмон бо таваҷҷуҳ ба собиқаи ҳамкориҳои гуногунпаҳлу бо Ҷумҳурии Мисри Араб, ба дурнамои робитаҳо бо Салтанати Уммон изҳори хушбинӣ намуд. Дар ҳамин ҳол, зикр шуд, ки равобит бо Ҷумҳурии Индонезия дорои мавқеи хос буда, ба зудӣ такони нав пайдо хоҳад кард.
Густариши муносибот бо кишварҳои қитъаи Африқо низ дар меҳвари сиёсати хориҷии Тоҷикистон қарор гирифта, ҳамкорӣ бо Ҷумҳурии Демократии Федеролии Эфиопия ва Ҷумҳурии Ангола дорои аҳамияти вижа ва фардои нек дорад.
Дар ҳамин ҳол бархе аз сафирони нав, баъд аз супурдани эътимодномаҳои худ ба Президенти Ҷумҳурии Тоҷикистон бо хабарнигорон суҳбат карданд. Дар ин робита, Жоаким Аугусто де Лемуша, ба намояндагони воситаҳои ахбори омма итминон дод, ки ба ҳайси нахустин Сафири фавқулода ва мухтори Ҷумҳурии Ангола дар Тоҷикистон ҷиҳати тақвияти ҳамкориҳои дуҷониба талош хоҳад кард. Бино ба гуфтаи ӯ, ҷониби Ангола ҳавасманди густариши муносибот бо Тоҷикистон буда, ба ин манзур аз тамоми имкониятҳои мавҷуда истифода хоҳад кард. Ин дипломат иттилоъ дод, ки ҳарду кишвар бо назардошти зарфиятҳои худ тасмим гирифтаанд, ки дар доираи ҳамкориҳо бештар масоили кишоварзӣ ва энергетикиро дар маркази таваҷҷуҳ қарор диҳанд.
Волфганг Баняй, Сафири фавқулода ва мухтори Австрия дар Тоҷикистон, сатҳи кунунии ҳамкориҳои ду кишварро ситоиш кард. Ба иттилои ӯ, дар назар аст, моҳи марти соли ҷорӣ президенти ин кишвар бо сафари расмӣ вориди Тоҷикистон шавад, ки ин ба равобити ҳасанаи ду кишвар такони тоза мебахшад.
Ҳамчунин сафирони Шоҳигарии Испания, Индонезия ва Шоҳигарии Норвегия низ дар суҳбат бо хабарнигорон итминон доданд, ки бо истифода аз мақоми дипломатии худ ҷиҳати тавсеаи ҳамкориҳо аз иқдомҳои амалӣ кор мегиранд.
Фирӯзи РАҲМОНИЁН,
"Ҷумҳурият"
Баёни ақида (0) Санаи нашр: 9.02.13 №: 19 Мутолиа карданд: 2796
