номаҳо
"Хатлон: китобхонаҳои маҳаллӣ ҳоли табоҳ доранд"
Мақомоти иҷроияи маҳаллии ҳокимияти давлатии шаҳри Сарбанд мақолаи "Хатлон: китобхонаҳои маҳаллӣ ҳоли табоҳ доранд" ("Ҷумҳурият", 4 декабри соли 2012, № 149)-ро бо иштироки шахсони масъули соҳа баррасӣ кард ва бо мақсади баландбардории самаранокии фаъолияти китобхонаҳо, сайқал бахшидани маҳорати китобдорон дар соли нав нақшаи чорабиниҳоро мураттаб сохт.
Дар шаҳри Сарбанд 4 китобхона, 1 китобхонаи марказӣ, 1 китобхонаи бачагона ва 2 китобхонаи деҳотӣ хонандагонро бо китоб таъмин менамоянд. Мутобиқи Барномаи давлатии компютеркунонии китобхонаҳои давлатию оммавӣ барои солҳои 2011-2013 дар соли 2012 китобхонаҳои марказӣ ва бачагонаи бахши фарҳанги мақомоти иҷроияи маҳаллии ҳокимияти давлатии шаҳр бо 2 адад компютер таъмин гаштанд ва ҳамчунин барои таъмири ҳамаи китобхонаҳо 11500 сомонӣ сарф гардид.
Дар соли рафта ба 2300 сомонӣ китобҳои тозанашр харида шуд, инчунин аз китобхонаи оммавии вилояти Хатлон ба номи Шамсиддини Шоҳин ва "Корвони китоб" ба китобхонаҳои шаҳр китобҳои илмӣ, сиёсӣ, соҳавӣ ва асарҳои бадеии зиёд ворид гардиданд.
Мақомоти иҷроияи маҳаллии ҳокимияти давлатии шаҳр баҳри таъмини китобхонаҳо бо технологияи компютерӣ ва асарҳои тозанашр минбаъд низ чораҳоро роҳандозӣ менамояд.
Қ. ЧИЛЛАЕВ, раиси шаҳри Сарбанд
Мақомоти иҷроияи маҳаллии ҳокимияти давлатии ноҳияи Фархор мақолаи "Хатлон: китобхонаҳои маҳаллӣ ҳоли табоҳ доранд" ("Ҷумҳурият", 4 декабри соли 2012)-ро бо иштироки васеи масъулони соҳаи фарҳанг баррасӣ кард.
Айни ҳол дар ноҳия 21 китобхонаи оммавӣ, аз ҷумла 18 китобхонаи деҳотӣ бо фонди 122542 нусха адабиёт ба сокинон хизмати маънавӣ мерасонанд. Аз ҷониби мақомоти иҷроияи ҳокимияти давлатии ноҳия ҷиҳати пурмаҳсул фаъолият кардани китобхонаҳо пайваста санҷишҳо гузаронида, баҳри бартарафсозии мушкилот тадбирҳо андешида мешаванд. Аз ҳисоби "Корвони китоб" соли гузашта 484 китоб дастрас гардид. Солҳои 2011-2012 ба миқдори 3673 нусха адабиёти тозанашр ба китобхонаҳо ворид гашт.
Бо ибтикори мақомоти иҷроияи ҳокимияти давлатии ноҳия китобҳои чанде аз адибони фархорӣ аз чоп баромаданд.
Бо ташаббуси баъзе омӯзгорон дар назди чанд муассисаи таълимӣ китобхонаҳои шахсӣ ташкил шуданд. Китобхонаи шахсии омӯзгор Абдулҳамид Маҷидзода дар мактаби № 10 бо теъдоди 8 ҳазор нусха, "Адабхона"-и Маҳмуд Мирзоев, омӯзгори мактаби № 5, бо теъдоди 4500 нусха адабиёт дар хизмати мактабиёнанд.
Мақомоти иҷроияи маҳаллии ҳокимияти давлатии ноҳияи Фархор минбаъд низ баҳри беҳтар гардонидани фаъолияти китобхонаҳо тамоми чораҳои заруриро меандешад.
Қ. КАРИМОВ, раиси ноҳияи Фархор
Баёни ақида (0) Санаи нашр: 12.02.13 №: 20 Мутолиа карданд: 5088