мулоқотҳо
Ташхиси техникию экологии неругоҳи Роғун баррасӣ шуд
4 апрел Президенти кишвар Эмомалӣ Раҳмон ноиби калони Президенти Бонки ҷаҳонӣ Каушик Басуро ба ҳузур пазируфт.
Дар мулоқот масоили дастгирии рушди иҷтимоию иқтисодии Тоҷикистон ва ташхиси техникию иқтисодӣ ва иҷтимоию экологии лоиҳаи бунёди неругоҳи Роғун баррасӣ шуданд.
Аз ҷараёни рушди кунунии иқтисодиёти Тоҷикистон изҳори қаноат карда шуд, зеро тавре зикр гардид, афзоиши маҷмӯи маҳсулоти дохилӣ дар ду моҳи соли 2013 7,2% ва таваррум 1,1 фоизро ташкил додааст.
Ёдоварӣ шуд, ки дар тӯли солҳои шарикӣ Бонки ҷаҳонӣ ба Тоҷикистон бештар аз 690 миллион доллари амрикоӣ қарзҳои имтиёзнок, грантҳо ва кумаки техникӣ пешниҳод намудааст ва ҳоло лоиҳаҳои зиёди дигар бо харҷи 236 миллион доллар маблағҳои ҷудонамудаи ин бонк татбиқ мешаванд.
Доир ба татбиқи босамари Стратегияи миёнамуҳлати Тоҷикистон оид ба баланд бардоштани сатҳи беҳзистии мардум барои солҳои 2013-2015, аз ҷумла тавассути нигоҳ доштани ҷойҳои мавҷудаи корӣ, таъсиси ҷойҳои кории нав ва пешгирӣ аз таъсири манфии буҳрони ҷаҳонии иқтисодию молиявӣ, гуфтугӯи судбахш сурат гирифт.
Ҳамчунин доир ба дигар ҷанбаҳои равобити Тоҷикистону Бонки ҷаҳонӣ, аз ҷумла роҳҳои мусоидат ба рушди ҳамкории минтақавӣ дар Осиёи Марказӣ табодули назар карда шуд.
Баёни ақида (0) Санаи нашр: 6.04.13 №: 49 Мутолиа карданд: 2371
