мулоқотҳо
Русия ба таҳкими ҳамкориҳо дар роҳи оҳан ҳавасманд аст
Владимир Якунин, роҳбари ширкати Роҳҳои оҳани Федератсияи Русия, ин нуктаро рӯзи 6 май дар мулоқот бо Эмомалӣ Раҳмон, Президенти Ҷумҳурии Тоҷикистон, баён кард.
Хадамоти матбуоти Президенти Ҷумҳурии Тоҷикистон бо пахши ин хабар иттилоъ медиҳад, ки зимни суҳбат масоили ҳамкории Тоҷикистону Русия ва кишварҳои Иттиҳоди Давлатҳои Мустақил ва соҳили Балтика дар бахши нақлиёти роҳи оҳан баррасӣ гардид. Зимнан мулоқоти роҳбарони сохторҳои марказии ин кишварҳо дар бахши роҳи оҳан, ки дар шаҳри Душанбе доир гашт, судманд арзёбӣ гардида, аз натиҷаҳои он изҳори хушнудӣ шудааст.
Роҳбари ширкати Роҳҳои оҳани Федератсияи Русия баъд аз анҷоми дидор бо Сарвари давлат дар ҳузури хабарнигорон изҳор дошт, ки мо дар садади тавсеаи бештари ҳамкориҳо дар ин бахш қарор дорем. Номбурда изҳор дошт, ки мо зимни мулоқот бо Эмомалӣ Раҳмон дар баробари масъалаҳои марбут ба роҳи оҳан, ҳамчунин дигар самтҳои ҳамкориро баррасӣ кардем. Владимир Якунин аз баҳои Президенти ҷумҳурӣ, ки Шӯрои роҳиоҳанчиёнро ниҳоди боэътимоде дар густариши равобити ҳамкориҳо дар қаламрави Иттиҳоди Давлатҳои Мустақил арзёбӣ кардааст, истиқбол намуд ва итминон дод, ки масъулони ниҳоди марбута низ уҳдадориҳои худро муваффақона анҷом медиҳанд.
Зикр шуд, ки феълан дар ҳамкориҳои мо мушкили ҷиддие вуҷуд надорад. Ончи ба назар мерасад, танҳо мушкили техникист ва масъулони соҳа ҷиҳати рафъи он чораҳои муассир меандешанд.
Фирӯзи РАҲМОНИЁН,
"Ҷумҳурият"
Баёни ақида (0) Санаи нашр: 9.05.13 №: 64 Мутолиа карданд: 2471
