мулоқотҳо
Рут Дрейфус дар ҳузури Эмомалӣ Раҳмон
15 май Эмомалӣ Раҳмон, Президенти Ҷумҳурии Тоҷикистон, узви Комиссияи байналмилалӣ бар зидди ҳукми қатл, собиқ президенти Конфедератсияи Швейтсария хонум Рут Дрейфусро ба ҳузур пазируфт.
Бино ба иттилои Хадамоти матбуоти Президенти ҷумҳурӣ, дар мулоқот масоили ҳамкории байналмилалии Тоҷикистон доир ба ҳифзи ҳуқуқу озодиҳои инсон, пешгирӣ аз таъйин ва татбиқи ҳукми қатл баррасӣ шудааст.
Дар Тоҷикистон татбиқи ҳукми қатл солҳои 1998 – 2003 маҳдуд гардида, аз соли 2004 то кунун ба он мораторий эълон шудааст. Ин амр аз ҷониби ниҳоду созмонҳои гуногуни ҷаҳонӣ мавриди истиқбол қарор гирифта, дар пайи он аз соли 2004 ба ин сӯ дар кишвари мо ҳукми қатл таъйин ва татбиқ нагардидааст. Дар ҳамин ҳол аз моҳи марти соли 2005 ба ҷойи ҳукми қатл ҷазои якумра маҳрум сохтан аз озодӣ таъин карда мешавад.
Хонум Рут Дрейфус, ки баъд аз мулоқот бо Президенти Ҷумҳурии Тоҷикистон дар ҳузури хабарнигорон суҳбат мекард, изҳор дошт, ки вобаста ба ин масъала Тоҷикистон дар масири дуруст қарор дорад. Собиқ президенти Конфедератсияи Швейтсария зикр намуд, ки кишвараш ҷонибдори бекор гардидани ҳукми қатл дар ҳамаи кишварҳои олам буда, барои расидан ба ин ҳадаф талошҳояшро идома хоҳад дод. Ӯ изҳори боварӣ намуд, ки дар ояндаи наздик масъалаи пура бекор шудани ҳукми қатл дар Тоҷикистон ниҳоӣ мешавад. Рут Дрейфус таъкид намуд, ки барои расидан ба ин ҳадаф Швейтсарияву ҳампаймононаш ва созмонҳои шарик дар канори Тоҷикистон хоҳанд буд.
Зимнан аз моҳи апрели соли 2010 дар Тоҷикистон доир ба зарурати хориҷ кардани ҳукми қатл аз қонунгузории кишвар гурӯҳи кории вижае амал мекунад. Хадамоти матбуоти Президенти ҷумҳурӣ мегӯяд, ки дар мулоқот Президенти кишвар Эмомалӣ Раҳмон таъкид дошт, ки давлати Тоҷикистон мавқеи ниҳоии худро доир ба ин масъала дар асоси хулосаҳои ин гурӯҳи корӣ, ки бо назардошти афкори ҷомеа ва таҷрибаи ҷаҳонӣ бароварда мешавад, муайян хоҳад кард.
Фирӯзи РАҲМОНИЁН,
«Ҷумҳурият»
Баёни ақида (0) Санаи нашр: 18.05.13 №: 68 Мутолиа карданд: 2545
