мулоқотҳо
Гуфтугӯи судманд бо Ҳасани Рӯҳонӣ
4 август Президенти Ҷумҳурии Тоҷикистон Эмомалӣ Раҳмон пас аз чанд лаҳзаи ба шаҳри Теҳрон расидан бо Президенти нави Ҷумҳурии Исломии Эрон Ҳасани Рӯҳонӣ мулоқот намуд.
Дар оғоз Президенти Ҷумҳурии Тоҷикистон Эмомалӣ Раҳмон Ҳасани Рӯҳониро бори дигар ба муносибати интихоб шуданаш ба мақоми Президенти Ҷумҳурии Исломии Эрон табрику таҳният гуфта, изҳори боварӣ намуд, ки муносиботи дӯстӣ ва ҳамшарикии Тоҷикистону Эрон минбаъд таҳкиму густариши бештар пайдо мекунанд.
Дар мулоқот доир ба ҷанбаҳои гуногуни робитаҳои бисёрпаҳлуи Тоҷикистону Эрон гуфтугӯ сурат гирифт. Таваҷҷуҳи зиёд ба густариши ҳамкории тиҷоратию иқтисодӣ, сармоягузорӣ ва энергетикӣ зоҳир гардид. Бо қаноатмандӣ зикр гардид, ки ҳоло дар Тоҷикистон беш аз 150 ширкати эронӣ фаъолияти пурсамар дорад ва раванди воридшавии сармояи мустақими эронӣ ба иқтисодиёти ҷумҳурии мо рӯ ба густариш аст.
Ҳавасмандии устувор ба татбиқи лоиҳаҳои муштараки минтақавӣ, аз қабили бунёди роҳи оҳан ва кашидани лӯлаҳои оби нӯшиданӣ, нафт ва хати интиқоли неруи барқ миёни Тоҷикистону Эрон таъкид гардид.
Баррасии масоили ҳамкорӣ дар бахшҳои илму техника, маориф ва фарҳанг низ аз мавзӯъҳои асосии суҳбат буд.
Гуфтугӯи судманд, ҳамчунин доир ба мавзӯъҳои минтақавию байналмилалӣ, аз ҷумла авзои кунунӣ ва ояндаи Афғонистон, ҳамгироӣ дар пешгирӣ аз хатарҳои ҷаҳони муосир сурат гирифт.
Эмомалӣ Раҳмон аз Ҳасани Рӯҳонӣ даъват намуд, ки ба Тоҷикистон бо сафари расмӣ ташриф биёрад. Ҳасани Рӯҳонӣ даъватро бо хушнудӣ пазируфта, таъкид дошт, ки дар наздиктарин фурсати муносиб ба Тоҷикистон ташриф меорад.
Баёни ақида (0) Санаи нашр: 8.08.13 №: 110 Мутолиа карданд: 2470
