маориф
Дар мактабҳои Тоҷикистон
3600 муаллим намерасад
Абдуҷаббор Раҳмонов, вазири маорифи ҷумҳурӣ, зимни нишасти матбуотӣ бо намояндагони васоити ахбори омма соли 2008-ро соли дастовардҳо арзёбӣ кард. Дар ин сол аз ҳисоби ҳамаи сарчашмаҳои маблағгузорӣ 170 иншооти соҳаи маориф барои 25638 ҷойи нишаст сохта ба истифода дода шуд, ки 41 иншоот ва 2220 ҷойи нишаст нисбат ба соли 2007 зиёд аст. Ва ҳамчунин 61 муассисаи таҳсилоти умумӣ аз таъмири асосӣ бароварда шуд.
Дар озмунҳои байналмилалӣ 43 хонандаи мактаби таҳсилоти умумӣ бо муваффақият ширкат варзид.
Беш аз 5 ҳазор нафар муҳоҷири меҳнатӣ дар курсҳои кӯтоҳмуддат касб омӯхт.
-Сатҳи сифати таълим нисбат ба солҳои гузашта боло рафт, аммо ҳанӯз ҳам он ҷавобгӯи талаботи давр нест, -афзуд вазир.
Абдуҷаббор Раҳмонов аз он изҳори нигаронӣ кард, ки 1450 нафар хатмкунандаи макотиби олӣ ба ҷойи таъиншудаи кор нарафтааст. Инчунин дар кишвар 3600 муаллим намерасад. Ва, албатта, вазорат барои ҳалли ин мушкилот чораҳои муассир андешидаву онҳоро амалӣ менамояд.
Тибқи маълумоти вазир 27 ҳазор нафар духтар пас аз хатми синфи 9 таҳсилро идома надодааст, ба истиснои 15 дарсади он, ки шояд ба омӯзишгоҳҳову коллеҷҳо барои ҳунару касбомӯзӣ рафтааст. Ва ин масъала зери назорати ҷиддӣ гирифта шудааст. Ба хотири ҳалли дурусту самарабахши он бояд ба Сарқонуни ҷумҳурӣ тағйирот дароварда шавад, яъне таҳсили ҳатмӣ то ба синфи 11 қарор бигирад.
А. РАҲИМ, «Ҷумҳурият»
Баёни ақида (0) Санаи нашр: №: Мутолиа карданд: 7125
