номаҳо
"Чаро ниҳолҳо камсамаранд?" мавриди омӯзиш ва баррасӣ қарор дода шуд
Вазорати кишоварзии Ҷумҳурии Тоҷикистон ба маълумоти шумо мерасонад, ки мақолаи Бахтиёр Асозода таҳти унвони "Чаро ниҳолҳо камсамаранд?", ки дар шумораи 56, 20 апрели соли 2013 дар рӯзномаи "Ҷумҳурият" рӯи чоп омадааст, дар ҷаласаи васеи кормандони раёсати рустанипарварӣ бо иштироки мутахассисони хоҷагиҳои ниҳолпарварӣ мавриди омӯзиш ва баррасӣ қарор дод.
Чуноне ки рӯзноманигор қайд менамояд, КВДҶ "Тоҷикниҳолпарвар" парастори ниҳолҳои гуногун дар ҷумҳурӣ ба ҳисоб меравад. Корхонаи мазкур дорои 14 хоҷагии ниҳолпарвар буда, миқдори ниҳолҳои омодакардаи онҳо дар давоми сол қариб 3 миллион бех мебошад. Инчунин дар ҷумҳурӣ 111 ҳазор хоҷагии деҳқонӣ ба қайд гирифта шудааст, ки аксарият новобаста аз соҳавӣ буданашон миқдори зиёди ниҳолҳои гуногунро парвариш намуда, ба фурӯш мебароранд.
Хоҷагиҳои ниҳолпарварии КВДҶ "Тоҷикниҳолпарвар" барои дастрас намудани тухмии босифат, кишти дурусти он ва ҳангоми фарорасии муҳлати пайванд тамоми корҳои муайяншударо ба анҷом мерасонанд, то ки ниҳолҳои хубу босифат ва дорои сертификатро дастраси хоҷагиҳои деҳқонӣ (фермерӣ) ва аҳолии ҷумҳурӣ гардонанд.
Аммо як нуктаро бояд зикр намуд, ки пас аз бо заҳматҳои зиёд ба воя расонидани ниҳолҳо бояд харидор дар оянда ба нигоҳубини он, парвариш, риояи коркарди агротехникӣ, обёрӣ, мубориза бар зидди зараррасонҳо ва касалиҳои боғу ток аҳамияти ҷиддӣ дода, тибқи маслиҳатҳои олимону мутахассисони соҳа фаъолият намояд ва ҳамзамон зимни харидани ниҳолҳо сертификати онро низ талаб кунад.
Вазорат бо мақсади амалӣ намудани Фармони Президенти Ҷумҳурии Тоҷикистон аз 27 августи соли 2009 таҳти № 683 "Дар бораи тадбирҳои иловагӣ доир ба рушди соҳаи боғу токпарварӣ дар Ҷумҳурии Тоҷикистон барои солҳои 2010-2014" ҳамасола оид ба парвариш ва нигоҳубини ниҳолҳо ва рӯёнидани ҳосили баланди мева, чорабиниҳои гуногун, аз ҷумла ярмарка- фурӯши ниҳолҳо, семинарҳои илмӣ-амалӣ ва машваратиро доир намуда, ҳамзамон маслиҳатҳои муфиди олимону мутахассисони соҳаро тавассути воситаҳои ахбори оммаи ҷумҳурӣ ба аҳолӣ пешниҳод мекунад.
Ҷ.САИДОВА,
муовини вазир
Баёни ақида (0) Санаи нашр: 14.09.13 №: 120 Мутолиа карданд: 5358
