мулоқотҳо
Сергей Наришкин дар ҳузури Эмомалӣ Раҳмон
Эмомалӣ Раҳмон, Президенти Ҷумҳурии Тоҷикистон, 7 октябр Сергей Наришкин - раиси Думаи давлатии Федератсияи Русияро, ки бо сафари расмӣ дар Тоҷикистон қарор дошт, ба ҳузур пазируфт.
Тавре Хадамоти матбуоти Президенти ҷумҳурӣ хабар медиҳад, дар мулоқот доир ба паҳлӯҳои гуногуни муносиботи бисёрҷониба ва ҳамкории судбахши ду кишвар гуфтугӯ сурат гирифтааст. Зимни суҳбат ҷонибҳо аз он ки заминаи қарордодию ҳуқуқии ҳамкории Тоҷикистону Русияро беш аз 200 санади дуҷониба ташкил дода, 30 санади дигар дар ҳоли баррасист, изҳори қаноатмандӣ намуданд.
Бино ба иттилои манбаъ, дар мулоқот ба манзури афзоиши ҳаҷми гардиши молу маҳсулот миёни Тоҷикистону Русия, ки рӯ ба коҳиш овардааст, фаъолияти бештари комиссияи байниҳукуматии ҳамкории иқтисодию тиҷоратӣ ва истифода аз омилҳои муассир зарур шумурда шуд. Сарвари давлат бо ёдоварӣ аз робитаҳои мустақими минтақаҳои Тоҷикистон бо зиёда аз 80 субъекти минтақавии Русия нақши Форуми байнипарлумонии «Тоҷикистон - Русия: имконоти ҳамкории байниминтақавӣ» - ро дар ин масир қобили таҳсин донистааст.
Сергей Наришкин, раиси Думаи давлатии Федератсияи Русия, ки баъд аз мулоқот бо Президенти Ҷумҳурии Тоҷикистон андешаҳояшро ба хабарнигорон баён мекард, бо тасдиқи ин ҳарфҳо ба дурнамои ҳамкориҳои бештари ду кишвар хушбинӣ кард.
Мавсуф аз тасвиби Созишномаи байни Ҷумҳурии Тоҷикистон ва Федератсияи Русия дар бораи мақом ва шартҳои будубоши пойгоҳи низомии 201-и Русия дар Тоҷикистон, ки ба тозагӣ аз сӯи парлумони Тоҷикистон сурат гирифт, истиқбол намуд. Ба андешаи ӯ, ин ва созишномаҳо дар бораи тартиби будубоши шаҳрвандони Тоҷикистон дар қаламрави Русия, содироти бебоҷи маҳсулоти нафтии Русия ба кишвари мо ба нафъи ҳарду кишвар хизмат намуда, дар таҳкими муносиботи стратегӣ мусоидат мекунанд. Сергей Наришкин изҳор дошт, ки бар асоси муқаррароти созишнома дар бораи тартиби будубоши шаҳрвандони Тоҷикистон дар Русия, имкон дорад, ки тоҷикон пас аз ворид шудан ба Русия 15 рӯз бидуни сабт дар мақомоти давлатӣ иқомат ва иҷозаи кор ба муддати то 3 солро дарёфт кунанд.
Раиси Думаи давлатии Федератсияи Русия гуфт, ки мо бо Ҷаноби Президент ҳамчунин масоили рушди ҳамкорӣ дар бахшҳои гуманитариро баррасӣ намуда, доир ба авзои кунунии минтақа ва тадбирҳои амниятӣ баъд аз хурӯҷи неруҳои эътилоф аз Афғонистон табодули назар кардем.
Фирӯзи РАҲМОНИЁН,
«Ҷумҳурият»
Баёни ақида (0) Санаи нашр: 10.10.13 №: 133 Мутолиа карданд: 2407
