маориф
Донишгоҳ сазовори нишони сифати аврупо гардид
Мӯмин Шарипов, ректори Донишгоҳи давлатии тиҷорати Тоҷикистон, дар нишасти матбуотӣ бо намояндагони васоити ахбори омма гуфт, ки дар ин муассисаи таълимӣ аз соли таҳсили 2005-2006 инҷониб ҷараёни таълим тибқи низоми кредитии таҳсилот ба роҳ монда шудааст. Аз ин таҷриба алҳол дар дигар донишгоҳҳои кишвар истифода мебаранд.
Донишгоҳ дорои комплекси ягонаи таълимӣ дар шаҳри Хуҷанд ва гимназияи тамоили иқтисодӣ мебошад.
Ба 6681 донишҷӯ 206 устод таълим медиҳад, ки беш аз 40 дар сади онҳо дорои дараҷаю унвони илмианд.
Як маркази компютерӣ ва 15 синфхонаи компютерӣ дар ихтиёри донишҷӯёну устодон қарор дорад.
Китобхонаи донишгоҳ дорои 3 толори хониш ва 200 ҷойи нишаст ва беш аз даҳ ҳазор китобҳои дарсӣ, методӣ ва бадеӣ аст. Ба тайёр кардани олимони соҳа дар муассиса диққати ҷиддӣ дода мешавад. Шӯъбаи аспирантура фаъолияти хуб дорад. Дар он 54 нафар аспирант ва 26 нафар унвонҷӯ аз рӯи 9 ихтисос ба корҳои илмӣ –тадқиқотӣ машғул аст. Дар муддати 3 соли охир 49 нафар рисолаи номзадӣ ҳимоя кард.
Ректор аз сатҳи таълим, ҳамкорӣ бо дигар донишгоҳҳои кишвар ва хориҷ аз он изҳори қаноатмандӣ намуд ва иброз дошт, ки имсол ин муассисаи таълимӣ сазовори нишони сифати Аврупо гардид.
Дар ҷавоби пурсиши хабарнигорон М. Шарипов посух гуфт, ки низоми кредитии таҳсилот барои боло бурдани сатҳи таълим мусоидат мекунад ва ҳам бояд ба фазои ягонаи таҳсилот тамоми донишгоҳҳои кишвар ворид шаванд.
А. РАҲИМ, «Ҷумҳурият»
Баёни ақида (0) Санаи нашр: №: Мутолиа карданд: 7012
