маориф
Бозгашти 200 донишҷӯ аз кишварҳои арабӣ
Соли гузашта бо назардошти нооромиҳои вазъи сиёсии кишварҳои арабӣ 200 донишҷӯи тоҷик аз донишгоҳҳои ин минтақа ба ватан баргардонда шуда, ҳамзамон 250 нафарии дигар аз Тоҷикистон барои таҳсил ба Ҷумҳурии исломии Эрон равонаанд.
Дар ин бора Амрохон Алиев, сардори раёсати муносибатҳои байналмилалии Вазорати маориф ва илм, зимни нишасти матбуотӣ иттилоъ дод.
- Мо вазифадорем, ки дар сурати ба вуҷуд омадани нооромиҳо донишҷӯёнро ба ватан баргардонем. Ҷавонони мо асосан барои омӯзиши забони арабӣ ба ин кишварҳо мераванд, ҳол он ки шароити омӯзиши ин забон дар дохили кишвар мавҷуд аст. Дар муассисаҳои таҳсилоти олии касбии Эрон бисёр ихтисосҳои муфид барои Тоҷикистон таълим дода мешаванд. Мо ба онҳо пешниҳод кардем, ки ба ҳамин тахассусҳо ҷавонони моро ба таълим фаро гиранд. Онҳо ҷавоби рад надоданд, аммо гуфтанд, ки бо дигар шудани вазъи кишвар каме интизор бошем, - зикр кард Амрохон Алиев.
Самариддин Афғонов, сардори Маркази барномаҳои байналмилалии Вазорати маориф ва илм, гуфт, ки айни ҳол беш аз 300 донишҷӯ аз тариқи стипендияи байналмилалии Президенти Тоҷикистон «Дурахшандагон» дар кишварҳои хориҷӣ таҳсил дошта, 36 нафари онҳо баъди хатм ба ватан баргаштанд.
- Аммо 3 нафар донишҷӯи гирандаи ин стипендия бинобар сабаби вайрон кардани талаботи шартнома ба суд кашида шуданд. Онҳо бо сабабҳои беморӣ аз таҳсил даст кашида, баъди хатми донишгоҳ ба ватан барнагаштанд. Ҳукумати Тоҷикистон барои таҳсили ҳар як донишҷӯ дар донишгоҳҳои хориҷ солона аз 3 то 8 ҳазор доллари амрикоӣ харҷ мекунад, - афзуд Самариддин Афғонов.
Раҳматулло Маҳмадшоев, муовини вазири маориф ва илм, оид ба тайёр кардани кадрҳо дар хориҷи кишвар чунин маълумот дод:
- Айни ҳол 17 ихтисосе, ки мо ба он ниёз дорем, дар дохили кишвар тайёр карда намешавад. Тибқи шартномаи байнидавлатӣ барои омода кардани ихтисосҳои мазкур донишҷӯёнро ба Русия, Беларус, Украина ва дигар кишварҳои Иттиҳоди давлатҳои мустақил мефиристем.
Дар посух ба пурсиши мо номбурда изҳор дошт, ки дар оянда бо назардошти муътадил шудани вазъи сиёсӣ ва амниятӣ бо кишварҳои арабӣ ҳамкориҳои илмӣ идома ёфта, донишҷӯёни тоҷик имкони идома додани таҳсилро пайдо хоҳанд кард.
Ҳарамгули Қодир
Баёни ақида (0) Санаи нашр: 15.01.2014 №: 11 Мутолиа карданд: 1564
