туризм
Консепсияи рушди туризм
таҳия шуд
Соли гузашта биржаи меҳнатии ҷавонон 11 маротиба ярмаркаи ҷойҳои кории холиро доир намуд, ки дар натиҷа 527 нафар ба ҷойи кори доимӣ роҳхат гирифта, ҳамзамон 255 нафар ҷавони хоҳишманд барои омӯзиш ба курсҳо равона гардид. Ин ва дигар масоили муҳими марбут ба фаъолияти ҷавонон дар нишасти матбуотии Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон мавриди назар қарор дода шуд.
Раиси кумита Маликшо Неъматов ҷараёни татбиқи сиёсати давлатии ҷавононро дар сохторҳои кумита бо далелҳои воқеӣ иброз намуда, перомуни иҷрои барномаҳои амалкунанда оид ба тарбияи ҷавонон дар рӯҳияи ватанпарастӣ, пешгирии онҳо аз пайвастан ба ҷараёну равияҳои номатлуби ҷомеа ва баланд бардоштани сатҳи фарҳанги сиёсиву маърифати ҳуқуқии ҷавонон ҳарф зад.
Дар ҷараёни пурсиши рӯзноманигорон оид ба фаъолияти бахшҳои фарогири кумита М. Неъматов изҳор дошт, ки новобаста аз тадбирҳои амалишуда ва муваффақиятҳои бадастомада, дар фаъолияти Кумитаи ҷавонон, варзиш ва сайёҳӣ камбудӣ ва масъалаҳои ҳалталаб низ ҷой доранд. Новобаста аз он ки соли 2008 варзишгарони тоҷик аз Бозиҳои ХХIХ олимпии Пекин 2 медал ва дар дигар мусобиқоти байналмилалӣ маҷмӯан 217 медал ба даст оварданд, ин муваффақият моро пурра қонеъ карда наметавонад. Барои ноил шудан ба комёбиҳои бештар ва рушду инкишофи варзиш дар мамлакат кумитаи олимпӣ ва федератсияҳои варзишии ҷумҳуриро зарур аст, ки дар ҳамкорӣ бо Кумитаи ҷавонон, варзиш ва сайёҳӣ дар фаъолияти худ аз усулҳои наву пешқадам истифода баранд.
Қайд шуд, ки инкишофи туризм ва фароҳам овардани шароити мусоид барои сайру саёҳат зери назари кумита ва зерсохторҳои он қарор гирифтааст. Бо назардошти соҳаи афзалиятнок ба ҳисоб рафтани туризм дар иқтисодиёти кишвар лоиҳаи Консепсияи рушди соҳаи туризм дар Ҷумҳурии Тоҷикистон таҳия гардидааст, ки он дар инкишофи равандҳои сайёҳӣ дар мамлакат мусоидат хоҳад кард.
Фирӯзи РАҲМОНИЁН,
«Ҷумҳурият»
Баёни ақида (0) Санаи нашр: №: Мутолиа карданд: 8771
