маориф
ДТТ. Озмоишгоҳҳои нав –кафолати сатҳи баланди касбӣ
Анвар Абдурасулов, ректори Донишгоҳи техникии Тоҷикистон, дар нишасти матбуотӣ ёдовар шуд, ки Президенти ҷумҳурӣ Эмомалӣ Раҳмон муассисаи илмию таълимии мазкурро чун фишанги таконбахши техникаю технология ва фарҳанги техникии ҷомеа арзёбӣ намуда, вазифа гузошт, ки бо истифода аз дастовардҳои навтарини илмию техникӣ бояд мутахассис омода созад.
Ба хотири иҷрои супоришҳои Сардори давлат, аз ҷумла дар сатҳи касбии баланд омода намудани мутахассисон, дар навбати аввал барои таҳкиму такмили заминаҳои таълимӣ саъй намудем. Дар соли 2008 беш аз 60 дар сади синфхонаву озмоишгоҳҳои донишгоҳ таъмир гардида, бо таҷҳизоти нави замонавӣ муҷаҳҳазонида шуданд. Инчунин дар донишгоҳ китобхонаи электронӣ ба фаъолият шурӯъ намуд, ки он имконияти васеи истифодаи адабиётҳои илмию техникии кишварҳои ҷаҳонро барои устодону донишҷӯён фароҳам овардааст.
Дастоварди дигар таъсиси озмоишгоҳи илмию таълимии манбаъҳои барқароршавандаи энергия аст, ки он тибқи лоиҳаи ТЕМПУС ва дастгирии давлатҳои Иттиҳоди Аврупо сурат гирифта, ҳоло дар он 20 магистр таҳсил менамояд. Озмоишгоҳ бо таҷҳизоти нави замонавии арзиши умумиаш беш аз 1 миллион доллари ИМА муҷаҳҳаз буда, дар заминаи он бобати дастрас намудани воситаҳои таълимӣ ҳамкорӣ бо Донишгоҳи технологии Афина (Юнон), Донишгоҳи технологии Гамбург (Олмон) ва Донишгоҳи технологии шоҳаншоҳии Стокголм (Шветсия) ба роҳ монда шудааст.
Бино ба иттилои Анвар Абдурасулов, феълан донишгоҳи мазкур бо 30 маркази илмиву таълимии ҷаҳон робита дошта, тасмим гирифтааст, филиалҳои муштараки Донишкадаи пӯлоду хӯлаҳои Маскав ва Маркази илмиву фарҳангии «Маҳёр»-и Ҷумҳурии Исломии Эронро таъсис диҳад.
Дар айни замон чанд озмоишгоҳи дигар низ бо таҷҳизоти нав, аз ҷумла стансияи коммутатсионии истеҳсоли ширкати ЗТИ-и Ҷумҳурии Мардумии Чин ва системаи замонавии Сиско, таъмин гаштаанд.
Хайринисои Расулӣ,
«Ҷумҳурият»
Баёни ақида (0) Санаи нашр: №: Мутолиа карданд: 7021
