маориф
ДТТ: УСТОДОН ҶОИЗАИ ИСМОИЛИ СОМОНИРО СОҲИБ ШУДАНД
- Курсҳои якуму дуюм дар ҳамаи факултаҳо бо низоми кредитии таҳсилот фаро гирифта шудаанд. Барои пешбурди ин низом донишгоҳ ба таҷҳизоти нави замонавӣ муҷаҳҳаз гардонда шуд, - гуфт зимни нишасти матбуотӣ ректори Донишгоҳи техникии Тоҷикистон ба номи академик Муҳаммад Осимӣ, Ҳайдар Одинаев.
Зикр гардид, ки танҳо барои мустаҳкам намудани заминаи моддӣ - техникӣ ва рушди парки технологии донишгоҳ дар соли 2013 зиёда аз 100 ҳазор сомонӣ ҷудо шуд. Устодони ҷавон С. Гадоев ва С. Насриддинов Ҷоизаи Исмоили Сомониро дар соҳаи илму техника соҳиб шуданд.
Маъмурияти донишгоҳ нақша дорад, ки базаи лаборатории кафедраҳоро мустаҳкам намояд. Изҳор гардид, ки дар кафедраҳо устодони унвондор каманд ва бояд ин норасоиро бартараф кард. Чораҳои зарурӣ дар ин маврид андешида шудаанд.
Ректор зимни посух ба хабарнигори рӯзнома гуфт, ки устодони донишгоҳ дастоварду ихтирооти зиёди илмӣ доранд, барои ин патент ҳам гирифтанд, аммо на ҳамаи ин дастовардҳо дар амал татбиқ гардидаанд. Устодони донишгоҳ гуфтанд, ки як сабаби дар истеҳсолот истифода нашудани ин ихтироот дар кишвар набудани имкони зарурӣ мебошад.
Фарзонаи ФАЙЗАЛӢ
Баёни ақида (0) Санаи нашр: 21.01.2014 №: 15 Мутолиа карданд: 1478
