маориф
ДУ ИХТИСОСИ НАВ ТАЪСИС ЁФТ
Хуршед Зиёев, ректори Донишкадаи давлатии забонҳои Тоҷикистон ба номи Сотим Улуғзода, зимни нишасти матбуотӣ гуфт, вазифаи асосии донишкада тарбияи кадрҳои баландихтисоси забондон, омӯзгорон ва тарҷумонони оянда буда, таълим аз даҳ забон дар бист ихтисос сурат мегирад, ки ду ихтисос – таҳсилоти томактабӣ ва забони русӣ ё англисӣ соли 2013 таъсис ёфтанд.
Ректор иброз дошт, ки низоми таҳсили кредитӣ ба мустақилияти донишҷӯ ва сифати таълим таъсири мусбат мегузорад. Бинобар ин тамоми гурӯҳҳои рӯзона бо низоми нав таҳсил доранд. Дар назар аст, ки соли ҷорӣ гурӯҳҳои академӣ ва ғоибона низ ба низоми кредитии таҳсил гузаронда шаванд. Давомоти донишҷӯён ба ҳисоби миёна 90 дарсадро ташкил дод. Вале дараҷаи азхудкунии барномаи таълимӣ бо 82,5% ва 79,1% ҷамъбаст шуд ва ба гуфтаи ӯ ин камбудии давраи гузариш аст, ки бо кӯшиши ҳамаҷониба солҳои оянда рафъ хоҳад шуд.
Фаъолияти илмӣ ва инноватсионии донишкада пешравиҳо дорад. Давоми соли гузашта аз рӯи 6 самти илмӣ корҳои илмӣ-тадқиқотӣ бурда шуд. 13 монография, 143 мақола (118 илмӣ ва 24 илмӣ-методӣ), 10 дастури таълимию методӣ ба табъ расид. 7 устоди донишкада рисолаҳои докторӣ ва номзадӣ дифоъ карданд. Донишҷӯёни донишкада ҳамасола дар озмунҳои ҷумҳуриявӣ ва байналмилалӣ ширкат меварзанд. Аз ҷумла, донишҷӯи донишкада дар озмуни 5-уми ҷумҳуриявии «Донандагони забони чинӣ» иштирок карда, сазовори ҷойи аввал гардид. Бад-ин васила ба озмуни 12-уми байналмилалии «Донандагони забони чинӣ» дар шаҳри Пекини Ҷумҳурии Мардумии Чин (июл-августи соли 2013) роҳхат гирифта, дар байни 90 давлати дунё ва 125 иштирокчии озмун ҷойи сеюмро ишғол намуд.
Ш. ҚУРБОН
Баёни ақида (0) Санаи нашр: 25.01.2014 №: 19 Мутолиа карданд: 1473
