мулоқотҳо
РИЧАРД ҶОНС ДАР МАҚОМИ НАМОЯНДАГӢ УЛФ ҲИНДСТРОМРО ИВАЗ НАМУД
28 январ Эмомалӣ Раҳмон, Президенти Ҷумҳурии Тоҷикистон, Масару Хонма, мудири Бонки аврупоии таҷдид ва рушд оид ба Осиёи Марказиро ба ҳузур пазируфт.
Бино ба иттилои Хадамоти матбуоти Президенти Ҷумҳурии Тоҷикистон, дар мулоқот масоили кунунӣ ва дурнамои муносибот баррасӣ шуда, таъкид гардидааст, ки ду ҷониб минбаъд низ метавонанд дар бахшҳои энергетика, нақлиёт, роҳсозӣ, кишоварзӣ ва коркарди саноатии маҳсулоти ин соҳа, обрасонӣ, дастгирии бахши хусусӣ ва ғайра ҳамкории босамар дошта бошанд.
Баъд аз мулоқот бо Сарвари давлат Масару Хонма, ки ба манзури муаррифии Ричард Ҷонс, намояндаи нави доимии ин ниҳоди молиявӣ ба Тоҷикистон омадааст, дар суҳбат бо хабарнигорон натиҷаҳои дидору гуфтугӯ бо Президенти мамлакатро судманд арзёбӣ кард. Бино ба гуфтаи ӯ, дар ҷараёни суҳбат тарафҳо ҷиҳати тақвият ва роҳҳои васеъ намудани доираи ҳамкориҳо табодули назар кардаанд. Зимнан, Масару Хонма изҳор дошт, ки дар заминаи тавсияи Президенти Ҷумҳурии Тоҷикистон ҷиҳати ду маротиба афзун намудани ҳаҷми маблағузорӣ ва ҷалби сармояи хориҷӣ ба рушди кишвар талош хоҳанд кард.
Ричард Ҷонс, намояндаи нави доимии Бонки аврупоии таҷдид ва рушд дар Тоҷикистон, гуфт, ки баҳои Эмомалӣ Раҳмон ба сатҳи ҳамкориҳои Тоҷикистону Бонки аврупоии таҷдид ва рушд маро ба тавсеаи минбаъдаи он ҳавасманд намуд. Зимнан, иттилоъ дода шуд, ки имсол намояндагии ниҳоди мазкур аз рӯи стратегияи нави ҳамкорӣ бо Тоҷикистон амал хоҳад кард. Ричард Ҷонс қавл дод, ки тавсияҳои Президенти Ҷумҳурии Тоҷикистон дар мавриди таҳкими ҳамкориҳоро меҳвари фаъолият қарор дода, масъулияти хешро дар ин замина ба таври шоиста анҷом медиҳад.
Ричард Ҷонс, дар ин мақом Улф Ҳиндстромро, ки зарфи чор сол дар Тоҷикистон фаъолият дошт, иваз намуд.
Аз замони ҳамкорӣ миёни Тоҷикистон ва Бонки аврупоии таҷдид ва рушд ба маблағи 400 миллион доллари амрикоӣ созишномаҳо ба тасвиб расида, феълан 7 тарҳи муштараки сармоягузорӣ бо фарогирии 112 миллион доллар дар ҳоли иҷро қарор дорад.
Фирӯзи РАҲМОНИЁН, «Ҷумҳурият»
Баёни ақида (0) Санаи нашр: 29.01.2014 №: 21 Мутолиа карданд: 1343
