мулоқотҳо
ТОҶИКИСТОНУ ЭРОН БА ТАВСЕАИ БЕШТАРИ МУНОСИБОТ ИҚДОМ МЕКУНАНД
14 феврал Эмомалӣ Раҳмон, Президенти Ҷумҳурии Тоҷикистон Иброҳим Раҳимпур - муовини вазири корҳои хориҷии Ҷумҳурии Исломии Эронро ба ҳузур пазируфт.
Бар пояи иттилои Хадамоти матбуоти Президенти Ҷумҳурии Тоҷикистон дар мулоқот масоили вобаста ба муносиботи гуногунҷанба ва ҳамкории судбахши ду кишвари дӯст баррасӣ шудааст. Зимнан, ҷонибҳо роҳҳои рушди ҳамкории иқтисодию тиҷоратӣ, сармоягузорӣ ва татбиқи босамари тарҳҳои муштараки ду кишвар дар бахшҳои гуногунро баррасӣ намуда, доир ба авзои кунунӣ ва дурнамои Афғонистон низ гуфтугӯ карданд.
Муовини вазири корҳои хориҷии Ҷумҳурии Исломии Эрон пас аз мулоқот бо Сарвари давлати Тоҷикистон дар суҳбат бо хабарнигорон ин нуктаро таъйид намуда, изҳор дошт, ки бо Эмомалӣ Раҳмон мулоқоти хубу созандае анҷом додем. Бино ба гуфтаи ӯ, дар суҳбат оид ба масоили феълӣ ва дурнамои равобити ду кишвари мутамаддини форсизабон табодули назар сурат гирифтааст.
Иброҳим Раҳимпур бо таваҷҷуҳ ба муносиботи кунунии Тоҷикистону Эрон дар сатҳи олӣ ба рушди ҳамкориҳои минбаъдаи ду кишвар дар бахшҳои сиёсӣ, иқтисодӣ, фарҳангӣ ва масоили минтақавию байналмилалӣ изҳори хушбинӣ намуд. Зикр гардид, ки зимни суҳбат такмили бархе аз барномаҳо ва амалисозии лоиҳаҳои нав аз ҷониби ширкатҳои эронӣ дар Тоҷикистон мавриди баррасӣ қарор дода шуд.
Фирӯзи РАҲМОНИЁН, «Ҷумҳурият»
Баёни ақида (0) Санаи нашр: 18.02.2014 №: 34 Мутолиа карданд: 1361
