номаҳо
Баъд аз муроҷиати Президент
Мусаллам аст, ки соҳаи маънавиётро бе нашри китобу таъсиси китобхонаҳои муҷаҳҳаз ва омода намудани шаклҳои электронии китобҳои гуногун ба сатҳи лозима бардоштан ғайриимкон аст. Ҳукумати Ҷумҳурии Тоҷикистон дар ин самт, хусусан дар таъмини мактаббачагони макотиби таҳсилоти умумӣ бо китобҳои дарсӣ, корҳои шоистаеро анҷом додааст.
Аммо имрӯз, китобхонаҳои мавҷуда, бахусус китобхонаи мактабҳо ва деҳот ба талаботу ниёзҳои рӯзафзуни ҷомеа ҷавобгӯ нестанд. Аз як тараф, дар натиҷаи гирудорҳои шаҳрвандӣ китобҳои мавҷуда талаф ёфтаанд ва аз тарафи дигар, аз лиҳози мазмуну мундариҷа кӯҳна гаштаанд. Ин нуктаро Президенти кишвар Эмомалӣ Раҳмон дар ҷаласаи васеи Ҳукумат басо нозукбинона ва бамаврид таъкид намуданд.
Кормандони Академияи илмҳои педагогии назди Вазорати маорифи ҶТ бо назардошти вазъияти ноҳинҷори китобхонаҳои мактабҳои таҳсилоти умумӣ ва маҳалҳо, тасмим гирифтанд қисме аз китобҳои китобхонаи шахсии худро ба мактабҳое, ки ҳамкорӣ доранд, бубаранд ва ҳоло ин корро анҷом медиҳанд. Аз ҳамаи шаҳрвандон, хусусан зиёиёни кишвар, низ даъват ба амал меорем, ки ба мо ҳамроҳ шаванд. Муроҷиати Президенти мамлакатро чун дастур ба ҳар фарди огоҳи ҷомеа қабул намуда, дар ин кори хайр саҳм гиранд. Тӯҳфа кардани китобҳои хондаю дар рафҳо хобида, ҳадяи китобҳои ба истилоҳ зиёдатӣ ва корҳои дигар дар ғанӣ гардонидани захираи китобхонаҳо, албатта, мусоидат менамояд. Ҳар нафаре, ки дар чунин маъракаи муҳим ва ҳатто сиёсӣ саҳм мегирад, яқинан дар боло рафтани донишу маърифати аҳли ҷомеа хидматеро адокарда маҳсуб мегардад.
Раёсати Академияи илмҳои педагогии назди Вазорати маорифи Ҷумҳурии Тоҷикистон
Баёни ақида (0) Санаи нашр: №: Мутолиа карданд: 3211
